Welatanê Ewropa ra 100 ra vêşêr cimatanê sivîlan bi eşkerayîyêka hempare bale ante serê cipersayîşanê ceza yê 11 welatanê Ewropa yê derheqê kesanê ke hetkarîye danê koçberan. Eşkerayîye de ame vatene ke nê welatan de, ke Îtalya û Belçîka zî tede yê, nê şopnayîşî par tewr tay 104 kesî kerdê hedefê xo.

 Eşkerayîya ke xo sepernena raporê platformê bi nameyê ReSOM’î (ke no platform cigêrayox, sazîyê cimatê sivîlî û otorîteyanê cayîyan ra yeno pê) tede ame vatene ke 11 welatan de 49 dosyayê cîyayî estê, hemverê 158 kesan de cipersayîş ameyo destpêkerdene. Eşkerayîye de ame vatene zafaneyê dosyayan de, yê ke derheqê ê kesanê hetkaran de ameyê akerdene, mirdîya xo delîlî çinê û ame vatene cipersayîşê winayênî xo rê kenê amac ke hemkarî bêro zihîfkerdene û hemverê koçberan de atmosferêko dişmenkî virazîyo. Heman wextî de ame vatene ke cipersayîşê winayênî zirar danê sîstemê dewleta huqûqî.

Eşkerayîye de heman wextî de ame vatene ke nê cipersayîşê ke kemî yenê amadekerdene, derheqê koçberan de beno sebeb ke fehmêko xirab ê sey “merdimê krîmînalî” virazîyo û no zî sînoranê Ewropa mîyan de beno sebebê kaosî. Sazîyanê cimatê sivîlî heman wextî de da zanayene ke dîrektîfa Yewîya Ewropa yê derheqê babete de, rîyê vatişanê lêlan û nêzelalan bena sebeb ke tîcaretê merdiman û hetkarîya merdiman yewbînan ra nêrê cîyakerdene.