Ewropa de kurdistanijî seba Bariş Çakanî vejîyayî meydanan

Kurdistanijanê Almanya û Danîmarka seba Bariş Çakano ke hêrişêkê nîjadperestî de kişîya çalakîyî kerdî.

Kurdistanijan şaristanê Bielefeldi yê Almanya û şaristanê Konpenhagî yê Danîmarka de seba Bariş Çakano ke hêrişêkê nîjadperestî de kişîya çalakîyî kerdî.

Bielefeld

Şaristanê Bielefeldî yê Almanya de rayberîya TCŞ û JCA de çalakîyêke ameye kerdene. Çalakîye pê deqayêkê rêzgirewtişî dest pêkerde. Çalakîkeran pankartê bi nuşteyê  ''Qet yew cînayet bêceza nêmaneno'' û ''Destûr mede qirkerdişan, qesasê ci bigêrê'' kiriştî.

Çalakîye de hêrişê dewleta tirke yê vera Rojawan, tedaya vera HDPyî û hêrişê hewayî yê vera Kampa Mexmûrî zî ameyî protestokerdene.

Çalakîye de seba vîrameyîşê Bariş Çakanî muzîkê kurdî ame goştarîkerdene û ama vatene: ''Hêrişê vera Barişî hêrişê vera nasname, estbîyayîş, cuye, ziwan û kulturê ma yo. Ganî faşîst û sûcdarî bêrê cezakerdene.''

Kopenhag

Paytextê Danîmarka Kopenhag de rayberîya Meclîsê Cinîyan û NCDKyî de hêrişê nîjadperestî yê vera şarê kurdî, qetilkerdişê Bariş Çakanî, şîdetê polîsanê vera ciwanê Amedî pê çalakîyêke ameye protestokerdene.

Kurdistanijan pankartêka ke serê ci de fotografê Bariş Çakan û George Floydî têkişt bîye, kirişte. Pankarte de wina ameyêne nuştene: ''Seba ke rengê ci sîya bi /seba ke ziwanê ci kurdkî bi ame kiştene''

Çalakîye pê slogan û muzîkê kurdkî qedîyaye.