Federasyonê Elewîyanê Demokratîkan (FEDA) bi şîarê 'Raye cumleyêke ra pîlêr a' şaristanê Dortmundî yê Almanya de kongreya xo ya 9. viraşte.

 Sere de Hemsereka Kongreya Înşaya Dêrsimî Huya Yer, îdarekarê CÎKî Cemal Bîngol, Wekîla verêne ya HDPyî Besîma Konca, nuştox Hasan Hayrî Ateş û Azîz Tunç, sîyasetmedar Îmam Canpolat xeylêk kesî tewrê kongre bîyî.

Kongre xoverdayîşê Rojhelatê Kurdîstanî û Îranî rê ameye dîyarîkerdene. Kongre de proseso sîyasî û rêxistinîya elewîyan ameyî ercnayene.

Serekê AABKyî Huseyîn Matî kongre de qisey kerd û da zanayene ke asîmîlasyonê vera kurdan û elewîyan dewam keno.  Matî da zanayene ke ê do weçînayîşan de paştî bidê Îtîfaqê Kede û Azadîye.

Hulya Yer zî bale ante qetilkerdişê Jîna Emînî ser û pare kerd ke ê do seba Jîna Emînî xoverdayîşê xo berzêr bikerê.

Netîceya kongre de Demîr Çelîk û Hûrîye Kabayel bîyî hemserekê neweyî yê FEDA û seba heyetê rayberdişî zî 15 kesî ameyî weçînayene.

Nê kesî zî seba heyetê rayberdişî ameyî weçînayene: Hasan Hayrî Ateş, Azîz Tunç, Asumane Ergin, Gulperîye Îlhan, Îsmail Demirdelen, Huseyîn Akmaz, Gunaye Sirlan, Alîşan Tekîn, Hasan Aslan, Ozcan Agdaş, Turaç Samer, Besîme Kaçar, Muzaffer Çîçek, Gulîzare Dogan û Oktay Can.