Rûsya de serrgêra Hemleya 15ê Tebaxe bi konser û festîvalan yeno fîrazkerdene. Festîvala Kulturê Kurdan a ke paytextê Rûsya Moskova de ameye kerdene,  dîyarîya Hemleya 15ê Tebaxe ameye kerdene.

Kurdistanijê Rûsya û derûdorî, temsîlkarê Îdareyê Xoserî yê Rojawanê Kurdîstanî û xeylêk hunermendî tewrê festîvale bîyî.

Hemserekê Otonomîya Kulturî ya Kurdanê Rûsya Farxat Patîyevî, Temsîlkara Cinîyan ê Kurdan ê Rûsya Tara Qadîr, Temsîlkarê Îdareyê Xoserî Reşad Bênavî festîvale de qisey kerd û înan ard ziwan ke xêrê Rayberê Şarê Kurdî Abdullah Ocalanî ra Hemleya 15ê Tebaxe dest pêkerd û na hemle bîya sebebê ganîbîyayîşê kurdan.

Koma Agirî, Koma Dîcle û Firat, Koma Dîlana Kurdî, Barîn, Koma Kulîlkên Rojê, Koma Zîlan, Koma Bêrîtan, Koma Rojbîn û Koma Perpil festîvale de vejîyayî sehne ser.

Çarçewa festîvale de musabeqayî ameyî kerdene û xelatî dîyayî.

Peynîya festîvale de zî hunermendan Sarê Haciyeva, Hecî Mûsa û Nesrîne girseyî reyde deyîrî vatî.