Hemsereka Partîya Çepe ya Meclîsê Hambûrgî Cansû Ozdemîre serê hesabê xo yê torê cimatkîyî ra fotografê beyraqa PKK’yî û DPA seba teqîbkerdoxanê xo şirawitîbî, pare kerdîbî û cezaya pereyan aye rê amîbî dayene. Ozdemîra ke ceza nêdaye do vejîyo mehkema.
Bi wesîleya serrgêra qedexeyê xebatanê PKK’yî yê Almanya hemsereka Partîya Çepe ya Meclîsê Hambûrgî Cansû Ozdemîre roja 27’ê Gulan a 2017’î de serê hesabê xo yê Twîtterî de vatibi „Fek qedexeyê PKK’yî ra vera bidê.“
Ozdemîre parekerdişê xo de ca dabi fotografê beyraqa PKK’yî ke ajansê xeberan ê Almanan DPA verî aboneyanê xo dir pare kerdebî. Dimayê cipersayîşî ra mehkemeya cayîye 500 Euro cezaya pereyan dabî Ozdemîr a Partîya Çepe. La Ozdemîre ceza nêdaye û cezaya pereyan bîye 1500 Euro. Parlamentera Partîya Çepe Ozdemîre cezaya ke aye rê amîbî dayene berde mehkemeya temyîze û do vejîyo mehkema.
Ameyêne pawitene ke roniştişê dewaya yewine ya Ozdemîre no hewteyê vernîya ma roja Dişemeyî Mehkemeya îdareyê Hambûrgî-Altona de virazîyo, la mehkema pêhesna ke dewa talûqê 28’ê Teşrîna Verêne ameya kerdene. Hemsereka bîne ya Partîya çepe ya Eyaletê Hambûrgî Sabîna Boeddînghaûse zî hemverê qerarê mehkema de razînêbîyayîşê xo ard ziwan.
Boeddînghaûse vat, “Ganî peynî ro muhakemekerdişê merdimanê seba parekerdişanê sembolan bêro ardene. Nê sembolê winayênî sembolê têgêrayîşo ke DAÎŞ’ê dişmenê demokrasîyî û cinîyan qedînayo yê.” Çimeyanê cipersayîşî pêşnûmeyê Wezaretê Karanê Zereyî 2’ê Adar a 2017’î de 16 eyaletan rê şirawito. Pêşnûme de sere de beyraqê YPG, YPJ, PYD û fotografê Rayberê Şarê Kurdî Abdullah Ocalanî zî tede heme sembolê têgêrayîşê azadîya Kurdan ameybî qedexekerdene.
