Halîl Şen cayo ke çalakîye kerde de ame vîrardene

Welatperwero kurd Halîl Şeno ke bajarê Dresdenî yê Almanya de serrgêra Komployê 15ê Sibate de vera tecrîdî xo vêşna, cayê çalakîya xo de ame vîrardene.

Welatperwero kurd Halîl Şenî bajarê Dresdenî yê Almanya de serrgêra Komployê 15ê Sibate de vera tecrîdî xo vêşnabi. Şen cayê çalakîya xo de ame vîrardene.

Aktîvîteya vîrardişî hetê Federasyonê Kurdistanijanê Azadan ê Rojhilatê Almanya (FED-KURD)  ameye  organîzekerdene. Aktîvîte nêzdîya banê Meclîsê Eyaletê Saksenî ke Şenî çalakîya xo verê ci de kerde, ameye kerdene. Kurdê ke dormeyê Dresden de ciwîyenê û dostê Şenî tewrê ci bîyî. 

Aktîvîte bi rêzgirewtişî dest pêkerd dima ra bi nameyê FED-KURDî Kerem Gokî qisey kerd. Gokî vat: ''Ma pêro zanê ke ey Kurdîstan û Rayber Apoyî ra zaf heskerdene û hesretê înan antêne. Tim hersê xo yê vera komplokeran ardêne ziwan. Êyê  ke ey nas kenê zana ke o wayîrê keda pîle bi.''

Bi nameyê Têgêrayîşê Cinîyan ê Kurdan ê Ewropa  (TJK-E) aktîvîste Zozane Serhat qisey kerd. Serhate vat: ''Manaya çalakîya fedayîye ya Halîl Şenî pîl a. Rolê komplokeran mergê nê embazan de esto. Ganî semedê şiknayîşê tecrîdî têkoşîn bêro pîlkerdene.''

Badê qiseykerdişan cayê çalakîye de vilîkî û ameyî ronayene û mûmî ameyî tafînayene.