Depeyij û Saricanij  ê ke Hambûrg de manenê, kombîyayîşêk de xoverdayîşê grevê vêşanîye silam kerd.

Dimayê deqayêk rêzgirewtişî, bi nameyê komîteya amadekarîye şaredaro verên ê Depe Burhan Kacamanî qisey kerd û vat, xoverdayîşî ra teber qet alternatîfêko bîn ê Kurdan vera faşîzm û dîktatorîya Erdoganî çin o.

Parlamenterê HDP'yî yê Mûşî Ahmet Yildirimî zî vat, “Ma ewro tîya de meyman nîyê, ma wayîrê keye yê. Welatê ma sey cenetî yo. Depeya ke Mazlum û Xeyrî tede ameyê dinya, bîyê pîlî, cayê nê heme rindekîyan o. Şarê ma prosesêko zaf giranî ra derbaz bibo zî ganî ma hêvîya xo tu cara vîndî nêkerê. Ma do tu cara sereyê xo vera faşîzm û zulmî de ro nênê. Weçînayîşo ke Adare de do bêro kerdene weçînayîşêko normal nîyo. Seba ma sey referandûmî yo. Apeygirewtişê îradeyê ma yo ke amebi hespkerdene yo.”

Mele Eşrefî zî bi nameyê CÎK'î qisey kerd û ard ziwan ke, projeyê HDP’yî de ruhê peymana Medîneyî yena dîyayene. Eşrefî vengdayîş bi her kesî kerd ke wa rayanê xo bidê namzedanê HDP’yî.

Şewe de peyamê namzedanê HDP’yî yê Hemşaredarîya Depe Sever Uzune û Mahmût Ercanî, namzedanê HDP’yî yê Hemşaredarîya Saricanî Canan Tagtekîne û Bekîr Polatî ameyî wendene.

Temsîlkarê KAY-DER'î zî vengdayîş bi Depeyijanê bajaranê Tirkîya û dîasporayî kerd ke dormeyê namzedanê HDP’yî de bêrê pêser.

Şewe de Hozan Kawa, Zozan Zûdeme, Zinar Sozdar, Alî Geçîmlî, Hozan Bênave, Hozan Amed û Hunermend Hekîmoyî deyîrê xo pêşkêş kerdî.