Weçînayîşanê eyaletê Hamburgî de Sosyal-Demokratî bi rêjê se ra 39 ser kewtî. Partîya Keskan zî raya xo kerde zêdêr. Partîya Çepe zî se ra 9 rayî girewtî. Partîya Merkele CDU derbêka girane werde.
Eyaletê Hamburgî yê Almanya de roja yewşemeyî venga 1.3 mîlyon weçînitoxan ame kerdene ke raya xo bidê. Eyaletanê bînan ra cîyayêr Hamburg de ciwanê 16 û 17 serrî eşkenê ray bidê. Namzeta/o tewr ciwan/e 18, namezeta/o tewr kal/e zî 89 serre yê.
Rêjê tewrbîyayîşê weçînayîşî se ra 63 bi. Partîya Sosyal-Demokrate (SPD) goreyê weçînayîşê serra 2015î 6 puan kêmêr kerd la reyna zî bi rêjê se ra 39 bîye partîya yewîne. Partîya Keskana ke wextanê peyênan de zaf eyaletan de raya xo zêdêr kerde Hamburg de zî surprîz kerd û bi 11 puanan raya xo kerde zêdêr, se ra 24 rayî girewtî.
Partîya Serekwezîre Angela Merkel Yewîya Demokratanê Xirîstîyanan (CDU) weçînayîş de derba girane werde. CDU 5 puan kêmêr girewt û se ra 11 rayî girewtî.
Eke netîceyî bi nê hawayî bimanî Partîya Çepe kelîsteya xo de asta yewîne de ca da sîyasetmedara kurde Cansu Ozdemîr do parlamento de hûmara kursîyanê xo zbikera zêdêr û dostê kurdan Martîn Dolzer zî do bieşko meclîs de ca bigêro. Hemserekê Partîya Çepe Bernd Riexingerî Ozdemîre reyde vejîyayî verê weçînitoxan û serkewtişê xo fîraz kerd. Goreyê anketan Ozdemîre sîyasetmedara hîrêyêne ya ke Hamburg de tewr zaf yena heskerdene.
