Hêzanê Kede Haştîye û Demokrasîyî yê Îstanbulî Meydanê Îskelê yê Kadikoyî de eşkerayîye daye. Hemvervatoxê HDKyî Meral Daniş Beştaş  û Alî Kenanoglu û xeylê temsîlkarê partîyanê sîyasîyan, dezgeh, sazgeh û platforman tewrê ci bîyî.

Hemvervatoxa HDKyî Meral Daniş Beştaş ard ziwan ke rijyayîşê îqtîdarî bîyo nizdî û nê vatî: ''Dozgerî eşkerayîya xo de vato 'operasyon vera HDKyî.' Ma yew platfomê ke bi mîlyonan pabesteyê ma est ê. Ê vanê qey eşkenê muxalefetî biqedînê. Ewro kam ke heqanê xo paweno hedefê hukmê îqtîdarî de yo.  Her roje bêhuqûqîye neweyî benê. No operasyon vera heme muxalefetî yo. Ma pêro yew ê û ma do ser bikewê. Şarî nefesê xo tepişto Îmraliyî xebere paweno, şima vera HDKyî operasyon kenê. Ma semedê heq û azadîya şarî têkoşîn kenê. Şima bi hedefgirewtiş muxalefetî qesawetê nê prosesî xorîn kenê. Şima kenê muxalefetî parçe bikerî. Ma do heta peynî xover bidê. Şima nêeşkenê rojanmegeran ra, hunermendan ra sûcdar vejê. Şima sûcdar ê. Ma do miheqeq ser bikewê.''

Serekê Pêroyî yê EMEPî Seyît Aslanî zî vat îqtîdar herinda haştîye polîtîkaya şerî bi hewayêkê bişîdetî rayra beno.

Dima metnê çapemenî ame wendene. Eşkerayîye de ame vîrvistene ke Wan de qeyûm ame cakerdene, vera HDKyî operasyon ame kerdene û Dîlok de Serekê Pêroyî yê Birtek-Senî Mehmet Turkmen ame tepiştene û ame vatene ke coka têkoşînê demokrasîyî yê şarê kurdî û tikrî yew o. Eşkerayîye de ame vatene ke vera nê heme zext û hêrişan bi yewbîyayîşî ganî semedê Tirkîyaya demokratîke têkoşîn bêro kerdene.