Xoverdayoxanê Awbendê Tişrînî ra şervana YPJyî Bîşenge Çîya  ajansê ma rê qala xoverdayîşî kerd.

Bîşenge Çîya vist vîrî ke dewleta tirke hêrişê xo zêdînayî û vat: ''Dewleta tirke çend hêrişxanê xo bizêdîno zî ma Awbendê Tişrînî de xoverdayîşê girdî rayra benê. Ma do çirey peyser game meerzê. Çunke ma domanê yew şarî yê ke bawerîya ci pê azadîye est a. Şarê ma heta peynî paştî dano ma û ma zî xeyrê paştdayîşê înan bi hewayêkê dahîna qerardarî xoverdayîşê xo domnenê. Ma sey şervananê ke Awbendê Tişrînî pawenê, ma do bi ruhê şerê şarê şorişgêrî, çarçewaya sozê serkewitşî ke dayo şarê xo, heta peynî wayîrê herra xo bivejê.

Deweleta tirke ya îşxalkere hem bi çeteyanê xo hem zî bi metodanê teknîkî, bi droneyanê xokiştişî Awbendê Tişrînî de qirkerdiş keno. Ma têna vera çeteyan şer nêkenê. Ma vera droneyanê kiştoxan ê dewleta tirke şer kenê. Xora têna şervanî xover nêdanê, şarê ma û rojnamegerî zî bi fedakarîya pîle xover danê.''

Bişenge Çîya bitaybetî bale ante hedefgirewtişê Egîd Rojî ser û nê vatî: '' Rojnamegerî ke yenê Awbendê Tişrînî wazenê hêrişanê dewleta tirke û nê xoverdyaîşî dinya rê bidê eşnawitene. Coka dewleta tirke rojnamegeran hedef gena. Rojnamegerî şervan nîyê, çekê înan çîn ê, têna bi kamara û qelemanê xo kenê xoverdayîşê Awbendê Tişrînî rayrapêroyîye rê bidê eşnawitene.

Egîd Rojî rojnamegeranê fedakaran ê Awbedê Tişrînî ra yew bi. Ey hem raştîya şervanan, hem zî vengê şarê xoverdayoxî  dinya rê da eşnawitene. Seba ke heqîqatan vejo sefanê tewr verênan de sey rojnamegerê cesûrî ca girewt. Coka hetê dewleta tirke ra ame hedefgirewene. Ma zî do heta peynî têkoşîn bikerê û destûr medê no awbend bikewo destê dişenî.''