Hêrişê polîsanê Belçîka yê vera studyoyanê Medya Haber TV û Stêrk TVyî Bruksel de verê Qesra Edaletî de ame protestokerdene.

Xebatkarê wird kanalan, rêxistinê komelê sivîlî, çapemenîya Belçîka, sendîkawanî, kedkarê çapemenîya azade, sîyasetmedarê kurdî, hemserekê KCDK-E engîn Sever, endama KNKyî Nîlufere Koç zî tede xeylêk kurdîstanijî û dostê înan tewrê çalakîye bîyî. Çalakîkeran kamerayê ke polîsan şikitbî ardî verê çalakîye, pankarta 'Kurdan rê çapemenîya azade çin a?' akerdî.

Hemserekîya NAV-BELî çalakîye de vat: ''No operasyon seba krîmînalîzekerdişê çapemenîya kurdan ameyo kerdene.''

Nameyê TJK-E ser o Kezbane Dogan vat: ''Şima nêeşkenê ma bêveng bikerê. Çapemenîya azade do bêveng nêba.''

Kedkara Medya Haber TVyî Hevale Arslan vat: ''Polîsan 98 dolabî û 41 berê ma şikitî. Çapemenîya azade seba Tirkîya tehlukeyêko pîl o! No hêriş bi watişê Tirkîya û Fransa ame kerdene. Ma nê hêrişî qebul nêkenê. Ma do tim sûcanê Erdoganî teşhîr bikerê.''

Partîya Sosyalîste ya Belçîka ra Maxime Ramirezî û aktîvîst Rishi Singî zî hêriş şermezar kerd.

Stêrk TVyî ra Sebahattîn Gultekînî vat: ''Ewro Bruksel bîyo paytextê hêrişan. Ma hêrişanê serê çapemenîye qebul nêkenê. Ganî her kes wayîrê Çapemenîya Azade û heqê xo yê xebergirewtişî vejîyo.''

Qiseykerdişanê bînan ra dima çalakîkeran ber û kamerayê şikiteyî verê Qesra Sipîye de ronayî.