HDP'yî ra heyetêk selahîyetdaranê Komîteya Vernîgirewtişê Îşkenceyî (CPT) û Sekreterê Pêroyî yê Konseya Ewropa Thorbjørn Jaglandî reyde pêvînayîş kerd.

Thorbjørn Jaglandî reyde pêvînayîşî de, Hetkarê Gruba Yewîya Çepe ya Meclîsê Parlamenteran ê Konseya Ewropa û Berpirsîyaranê Têkilîyanê Teberî yê HDP'yî û Hetkarê Hemserekanê Pêroyî ra  Hîşyar Ozsoy, Feleknas Ûca, endama cagir a Meclîsê Parlamenteran ê Konseya Ewropa Pero Dundare û Temsîlkarê HDP'yî yê Konseya Ewropa Faîk Yagiz amade bîyî. CPT’yî reyde pêvînayîşî de Ozsoy û Ûca zî amade bîyî.

Tecrîdê Îmraliyî ame ercnayene

Heyetê HDP'yî selahîyetdaranê CPT’yî reyde pêvînayîşî de ard ziwan ke ganî tecrîdkerdişê Rayberê Şarê Kurdî Abdullah Ocalanî bi temamî bêro wedaritene.

Heyetî da zanayene, ê serdayîşê CPT’yî yê 6-17'ê Gulane muhîm vînenê ke Îmrali zî mîyan de înan xeylî hepisxaneyanê Tirkîya û Kurdistanî de cigêrayîşî kerdî û da zanayene, seba çareserkerdişê meseleyan ganî CPT bi israr rewşe teqîp bikero.

Selahîyetdaranê CPT’î zî da zanayene ke derheqê hepisxaneyan de serdayîşê ke înan kerdê de roparêk yeno amadekerdene û ê do nê raporî destpêk de pêşkêşê Enqere dima zî bidê selahîyetdaranê Konseya Ewropa.

Jagland: Meseleyê Kurdî meseleyo tewr muhîm o

Sekreterê Pêroyî yê Konseya Ewropa Thorbjorn Jaglandî reyde pêvînayîş de bi taybetî babete; çareserîya meseleyê Kurdî, zexten vera HDP’yî, meseleyê tepişteyanê sîyasîyan ê ke bi hezaran ameyê girewtene, qerarê Mehkemeya Heqanê Merdiman a Ewropa û nêzdîbîyayîşê Enqere yê nê qeraran; hetê bînî ra berpirsîyarîyê Konseya Ewropa ameyî rojdem. Jaglandî  ard ziwan ke, çareserkerdişê meseleyê Kurdî, meseleyanê tewr muhîman ê Konseya Ewrpa ra yew o û vat, ê do rojanê vernîya ma de hîratir nê meseleyî teqîp bikerê.

Komîsera Heqanê Merdiman şina Tirkîya

Komîsera Heqanê Merdiman a Konseya Ewropa Dunja Mîjatovîçe hewteyê ameyoxî de do şiro serdana Tirkîya.

Seba Tirkîya raportorêk newe

Seba Raportorîya Tirkîya ya Meclîsê Parlamenteran ê Konseya Ewropa, Komîsero verên ê Merdiman a Konseya Ewropa Tomas Hammerberg ame wezîfedarkerdene.