Hunermend Mazlûm Dora 11ê gulana 2021î de rîyê falîyetanê kulturkî ra ame tepiştene û a roje ra nata Zîndanê Stammheimî yê bajarê Stuttgartî yê Almanya de yeno tepiştene.

Goreyê xebera Yenî Ozgur Polîtîka Mehkemeya Berze ya Stuttgartî de roniştişê 60. de rixmo ke delîlê qîmkerdeyî çînêbî 3 serrî  û 3 mengî ceza dîyaye Dorayî. Avûkatê Dorayî vat muwekîlê ci rîyê xebatanê xo yê kultukî ra çarçeweya qanûnê 129byî de ame muhakemekerdene.

Dora roja tepiştişî ra vera polîtîkayanê zîndanî xover dano. Dorayî red kerd ke lingê ci prangakerde şiro mehkeme, nê semedî ra cezaya dîsîplînî dîyaye ci. Dima ra semedê protestokerdişê muameleyanê keyfîyan hucre de bedenê xo da adirî ver. Îdareyê zîndanî mudaxale kerd û Dora girewt binê tedawî. Badê nê dewaya bînê ameye akerdene. Seba ke bi çalakîya xo cuyeya tepişteyanê bînan eştê tehluke û zirar da malê dewlete 20ê êlule de cezaya pereyî ya 1.000 Euro û 2 serrî û 3 mengî cezaya zîndanî dîyayî Dorayî. Avûkatanê Dorayî vera na ceza muracatê mehkemeya berze kerd.

Mazlûm Dora 22ê êlule ra nata semedê protestokerdişê nêzdîbîyayîşê hêrişkarî yê kurdan grevê vêşanîye yê bêdem-bêdorî de yo. Dora ke bîyo 54 kîlo seba ke verî zî amelîyat bîyo û maneyê ci de platîn est o, ganî lezabez bêro tedawîkerdene.

Seba ke waştişê Dorayî bêrê caardene roja şemeyî mabênê saeanê 10:00-15:00î de Adresê Marshallstraße Ecke Königstraße Stuttgartî de do çalakîye bêro kerdene.