Meclîsê Cinîyan ê Amara û Yewîya Cinîyan a Sara Swêd de Kampanyaya '100 sebebê seba hukmkerdişê dîktatorî' danê dewamkerdene. Sîyasetmedar û pawitoxanê heqanê cinîyan zî pê vîdeoyan paştî daye kampanya.

Wekîlê Partîya Çepe û Vervatoxê Polîtîkaya Teberî Hakan Svennelingî vat: ''Yewîya Ewropa û Swêdî PKK kerd lîsteya terorî. Ganî no wedarîyo. Ma bi eşkera vanê ke wa etîketê terorî PKKyî ra wedarîyo.''

Endama Meclîsê Şaredarîya Uppsala Hanna Victoria Morck zî ard ziwan ke nêbeno ke wekîl 3u şaredarî wezîfeyê xo ra bêrê girewtene.

Îdarekara Ciwanan ê Şorişgêran Elîsabethe Nîlesol pare kerd ke Erdogan şîdetê vera cinîyan ê kurdan ra wa bêro hukmkerdene.

Wekîla Partîya Çepe Ilona Szatmarî Waldaû vat: ''Sîyasetmedaranê cinîyan ê kurdan rê tacîz yeno kerdene û ê tepişîyenê. Ganî nê kerdişî biqedê.''

Hetkarê Serekê Şaristanê Uppsala Per-Markus Rismanî vat seba hukmkerdişê Erdoganî sere de hêrişê vera HDPyî zaf sebebî estê.

Temsîlkara Partîya Çepe Monica waşt ke Erdogan hêrişanê vera HDPyî ra bêro hukmkerdene.

Endamê Meclîsê Şaredarîya Uppsala Alaxandra Dursoyî îfade kerd ke ganî Erdogan qirkerdişê cinîyan ra bêro hukmkerdene. 

Serekê Şaristanê Karlskoga yê Partîya Çepe Anna Lilja ard ziwan ke Erdogan hêrişê cinîyan û şar keno.