Bajarê Kolnî yê Almanya de  seba Yewîya Hêzî ya Şoreşgêre ya Dêrsimî bi moderatorîya Alî Guler û Guler Yildize şewa paştdarîye ameye organîzekerdene.

Şewe de hemsereka Şaredarîya Dêrsimî ya verêne Songul Erol Abdîle qisey kerd û bale ante qirkerdişê 38’î ser û wina va: ”38’î ra nat qirkerdiş dewam keno. Ziwanê ci yeno asîmîlekerdene. Kesê ke bi ziwanê xo, şarê xo rê xizmete kenê, nika hepisxaneyan de yê. 31’ê Adare de, ma do bi wayîrvejîyayîşê şarê xo ser bikewê.”

Parlamenterê HDP’yî yê Dêrsimî Alîcan Onlûyî zî qisey kerd. Onlûyî derheqê grevanê vêşanîye de va paştdarîya pête nêna dayene û wina dewam kerd: “Bawerîyî, nasnameyî, sîyaseto demokratîk binê tecrîdî de yo. Heta ke no tecrîd nêro şikitene mucadeleyê demokrasîyî nêno dayene. Her kesî ra zêde zî ma Elewîyî binê tecrîdî de yê. Ganî ma nê tecrîdî bişiknê. Talebî hîqûqî û heqdar ê.”

Temsîlkarê Partîzanî Mahmut Ozcan û temsîlkarê DÎDF’î Yucel Ozdemîr û Zîya Ulusoyî zî qiseykerdişî kerdî.

Aktîvîteya ke hetê Platformê Paştdarîye yê Yewîya Hêzî ya Şoreşgêre ya Dêrsimî ra ameyî viraştene de hunermendî Pinar Aydinlare, Alî Baran, Saît Baksî, Volkan Yagin, Dogan Çelîk, Hasan Saglam, Dîyar, Sena Dêrsîme,  Sengul Pake, Şîyar Munzur, Araz, Denîz Demane, Kîrwem Erdal, Delîl Xidir, Zarîfe Zerîne, Dîlane, Muslum Polat û Grup Les Etoîles De Botane sehne girewt.