Xeylê şaristananê Ewropa de kombîyayîşanê şarî de qalê Vengdayîşê Haştîye û Komelê Demokratîkî yê Rayber Apoyî ame kerdene.

Şaristanê Grazî yê Avusturya de sîyasetmedar Hozan Botanî kombîyayîş de qisey kerd û pare kerd ke vengdayîşê Rayber Apoyî vera qirkerdişê kurdan gamêk a û bi nê vengdayîşî têkoşîn derbazê safhayêka newîye bîyo.

Şaristananê Freiburg, Lahr û Stuttgartî yê Almanya de zî çarçewa Vengdayîşê Haştîye û Komelê Demokratîkî de kombîyayîşê şarî ameyî kerdene. 

Freiburg de sîyasetmedare Sultane Oger qisey kerd.Sultane ard ziwan ke têgêrayîşê azadîye erkê xo yo tarîxî ardo xo, coka ho xo vurneno û têkoşînê xo resneno astêka bîne.

Stuttgart de hetê FED-GELî û Meclîsê Şarê Kurdî ra kombîyayîş ame serûberkerdene û tîya de tarîxnas Mehmet Bayrakî qisey kerd.

Paytextê Fransa Paris de bi beşdarîya Hemsereka KCDK-E Zubeyde Zumrut, sîyasetmedar Hatîp Dîcle û Endama TJK-E Songule Omurcan kombîyayîşê şarî ame kerdene. Songule ard ziwan ke kurdî ganî nê prosesê neweyî û vengdayîşê Rayber Apoyî hol fam bikerê. Hatîp Dîcleyî îfade kerd ke ganî tecrîd biqedo ke Rayber Apo bi rehetî vengê xo biresno teberî. Zubeyde  Zumrut pare kerd ke ê do bi her hawayî paştî bidê nê prosesî.