Otonomîya Neteweyî û Kulturê Kurdî ya Yerşovî bajarê Saratovî yê Federasyonê Rûsya de, bi tewrbîyayîşê 50 delegeyan konferansê xo yê 2’yinî yê aleladeyî viraşt. Endamê Komîteya Têkilîyanê şarî yê Hukmatê Saratovî Îvan Doroşîn, hetkara şaredarê Yerşovî Svetlana Malînovskaya, hemserekê Otonomîya Federale ya Kulturê Kurdî yê Yerşovî Ferhat Patîyev û xeylî îdarekarê bînî yê otonomîye tewrê konferansî bîyî.

Konferans endamê Konseya Serekîya Pêroyîye ya KCK’yî Dîyar Xerîbî rê ame îthafkerdene.

 Qiseykerdişê destpêkî yê konferansî de sîyasetmedaro Kurd Ferman Garzanî sere de Kurdistan halê sîyasîyî yê herême ercna û vat ke hêzê mîyanneteweyîyî serê Sûrîye ra kenê ke herême newe ra dîzayn bikerê. Garzanî ard ziwan ke ganî Rûsya Sûrîye de Kurdan dir dîyalog rono.

Dimayê qiseykerdişan raporê çalakîyanê di serran ame wendene û derheqê problemanê Kurdan ê herême munaqeşeyî ameyî kerdene. Munaqeşeyan de hîna zaf hale asîmîlasyonî ame ercnayene û ame vatene ke ganî xebatê organîzekerdişî hîna xurt bêrê kerdene. Konferans de Mîrze Elî Adil û Gulîzera Sûltane seba hemserekîye û 9 kesî zî seba meclîsî ameyî weçînitene.