Kongreya 23yîne ya Kongreya Neteweyî ya Kurdîstanî (KNK) dest pêkerd û do rojan dewam bikera. 300 delegeyî tewrê kongre bîyî. Kongre bi merşê Ey Reqîbî dest pêkerd.  

Kongre de Hecî Ehmed, Riza Altûn û Alî Haydar Kaytan ameyî yadkerdene.

Hemserekanê KNKyî Ahmet Karamusî û Zeynebe Murad zî qisey kerd.

Zeynebe Murad îfade kerd ke ganî kurdî wayîrê Vengdayîşê Haştîye û Komelê Demokratîkî yê Rayber Apoyî vejîyê, destkewteyanê Rojawan û Başûrî bipawê û bibê yew.

Ahmed Karamusî dîyar kerd ke proseso ke bi vengdayîşê Rayber Apoyî dest pêkerdo girîng o û ganî her kes erk û mesuldarîyanê xo bîyaro ca.

Hemserekê Konseya Rayberdişî ya KCKyî Cemîl Bayikî û serkêşanê PKKyî ra Murat Karayilanî mesajêk şawit. Mesaj de wina ame vatene: 

‘’KNK seba çareserîya meseleya kurdan û caardişê yewîya neteweyî zemînêko xurt o. Rojhelatê Mîyanênî de hemsengîyê neweyî virazîyenê; kurdî zî kenê ke nê prosesî de bi aktîfî rol bigêrê. Coka na kongreya KNKyî girîng a. 

Seke zanîyeno Rayber Apoyî nameyê ma ser o dewleta tirke de prosesê dîyalogan ano ca ke meseleya kurdan çareser bikero. Ma amade yê ke mesuldarîya xo bîyarê ca. Ganî terefo bîn zî mesuldarîya xo bîyaro ca.

Vengdayîşê Rayber Apoyî û qewimîyayîşê peyê nînan zemînê yewîya kurdan bihêzêr kenê. Seba ke destkewteyê şarê ma bipawîyê caardişê yewîya demokratîke şert o. Sere de cinî û ciwanî pêro beşê komelî hêzê nê prosesî yê dînamîkî yê. Destek û beşdarîye do yewîye bihêz bikerê.

Seba caardişê yewîye rêxistinkerdiş zaf girîng o. Na babete de zî erk keweno milê KNKyî. Erk û mîsyonê KNKyî nê prosesî de zêdîyayê. Meseleya yewîya neteweyîye verê ma de meseleyêka tewr girîng a. Rayber Apo zî pêvînayîşê peyênî de na babete ser o vindert.

Kurdan hema yewîya xo nêarde ca. Na babete babeta ma ya tewr lezabez a. Ganî KNK cade konferansêkê neteweyîyî bikero.

Ma do nê prosesî ra dima hem sey endamanê KNKyî hem zî seba yewîya kurdan xebatanê xo rê dewam bikerê û erkanê xo bîyarê ca.’’