Endamê Merkezê Kultur û Hunerê Kurdan ê Theofilosî yê bajarê Limasolî yê Qibrisî teba dostê  xo şaîr Despo Pilavakî şîyî serdana çalakwanê xoverdayoxanê grevê vêşanîye yê Strasbourgî.

Pilavakî wextê serdane de qisey kerd û ard ziwan ke, dişmenê hempar ê Kurdan û şarê Rûmî, rayberîya faşîst a Tirkîya ya. Pilavakî  ard ziwan ke, têkoşînê Kurdan têkoşînê ey o û vat, “Şima seba azadîye şer kenê, ez zî teyna nusena, mûnaqaşa kena. Ez êdî zaf bîya kokim, nêbo nika koyan de bîyêne.”Kurdistanijêk zî Qibris ra ard ziwan ke seba ke serkewtişê xoverdayîşî yo birûmet ê vera tecrîdî ser bikewo ê do çalakîyan bikerê.

SARIKAYA: ÇÎYO TEWR MUHÎM GIRDKERDIŞÊ XOVERDAYÎŞÎ YO

Xoverdayoxanê grevê vêşanîye ra Mustafa Sarikayayî zî keyfweşîya xo  seba serdana Kurdistanijanê Qibrisî rê kerde û ard ziwan, xoverdayîşê grevê vêşanîye roje bi roje gird beno. Sarikayayî ard ziwan ke, paştdayîşê dostanê Kurdan zaf muhîm o û destnîşan kerd, çîyo tewr mûhîm her wareyî de girdkerdişê xoverdayîşî yo.

XEBATKARÊ JIN-TV ZΠ HEMGUREYÊ XO ÎKE REYDE BÎYÎ

Xebatkarê JIN-TV û Yenî Ozgur Polîtîkayî zî ameyî Strasboûrg û şîyî serdana çalakwananê grevê vêşanîye. Kedkarê çapemenîye hemgureya xo Gulîstan Îke, çalakwananê cinîyê bînî Dîlek Ocalane û Nûrgul Başarane reyde ameyî têhet.

Hetê bînî ra, teba grubêk Konfederasyonê Karkeranê Tirkîya yê Ewropa ra, bi seyan Kurdistanijî Almanya, Fransa û Swîsî ra ameyî serdana xoverdayoxanê grevê vêşanîye.