Kurdistanijan Almanya û Swîsre de seba azadîya Rayberê Şarê Kurdî Abdullah Ocalanî Neteweyanê Yewbîyayeyan (NY) rê mektubî erşawitî.

Şaristanê Guterslohî yê Almanya de kurdîstanijan û sûryanîyan seba azadîya Rayberê Şarê Kurdî Abdullah Ocalanî NYyî rê mektubî erşawitî.

Cinîyan ê kurdan zî şaristanê Bielefieldî ra bi heman waştişî mektubê xo erşawitî.

Kurdanê Cenevre reya verêne nêzdîyê 250 mektubî erşawitî NYyî rê. Partîya Karkere ya Swêdî paştî daye 'Hemleya Azadîye' û 70 mektubî erşawitî.

Hemserekê Merkezê Komelê Kurdan ê Cenevre Salîh Saglamî ANFyî rê qisey kerd û da zanayene ke ê do verê Ofîsê NYyî yê Cenevre de dest pê çalakîya roniştişî bikerê.

Hemsereke Bêrîvane Avci zî vat: ''Ma do seba şiknayîşê tecrîdî û azadîya Birêz Ocalanî dezgeh, partî û rêxistinanê Swîsre reyde kom bibê.''

Reyna bajarê Rapperswilî de bi eynî waştişî mektubî ameyî erşawetene.