Roniştişanê Komîteya Vera Cezakerdişê Kerdişanê Xiraban û Qijvistişî ya Neteweyanê Yewbîyayeyan (NY) 8ê temmuze de dest pêkerd û ê do heta 26ê temmuze dewam bikerê. Çarçewa roniştişan de derheqê tay sûcanê dewleta tirke de xebatî yenê kerdene. Rêxistina Maloca Internationale derheqê binpaykerdişanê heqanê merdiman ê herêmanê binê îşxalê Tirkîya de raporêk pêşkêşê CPTyî kerd û bale ante sûcanê şerî yê dewleta tirke û cerganê ci.

Temsîlkarê Maloca Internationalî Leonardo Perez Rodriguezî derheqê babete de ANFyî rê qisey kerd.

Perezî ard ziwan ke înan seba ke Tirkîya Sûrîye û Iraq de sey hêzê îşxalkerî bişinasîya raporê xo pêşkêş kerdo û vat: ''Raporê ma armanc keno ke no şer çarçewa qayîdeyan de bêro çareserkerdene. Yanî ma wina fikirîyenê ke çareserîya tewr hole na ya ke ganî Tirkîya sey hêzêkê îşxalkerî bişinasîya. Eke wina bibo ma do hîna zaf bieşkê kerdişanê ci ra Tirkîya mesuldar bivînê.

Ma do roniştişanê 16, 17 û 18ê temmuze de pêşnîyazê Komîteya Vergirewtişê Îşkenceyî bikerê ke Tirkîya wina bişinasîya. Komîte zî ganî herêmanê îşxalkerdeyan de vera îşkence têbigêra. Tirkîya bi kerdişanê xo yê Sûrîye û Iraqî huqûqê mîyanneteweyîyî binpay kena. Tirkîya kerdişanê xo ra nêna muhakemekerdene; çunke endama NATOyî ya. Eke şima endamê NATOyî bibê şima do bipawîyê. Kampanyaya ma vera nê ferasetî ya.''