Seba kesanê ke Cizîrê Şirnexî de mabênê 14ê kanûna 2015î û 2ê adara 2016î de wextê xoverdayîşê xoîdarekerdişî de  3 erdzemînan de hetê dewleta tirke ra ameybî qetilkerdene şaristanê Lyonî yê Fransa de rayberîya Amitie Kurdî de bi nameyê ''Çîyê ke xoîdarekerdişê Cizîrî de qewimîyayî'' konferansêk ame kerdene.

Konferans de zaf akademîsyenî, temsîlkarê komelê sivîlî, zaf fransizî û wekîlo verên ê HDPyî Faysal Sariyildiz zî amade bîyî.

Sariyildizî vist vîrî ke Serekkomarê Tirkîya Erdoganî Kurdîstan de sucê vera merdimîye kerde û vat: ''Dormeyê Cizîrî bi seyan tankî ameyî bombavarnayene. Mehmet Tunçî Parlamentoya Ewropa reyde o çax qisey kerd û vatbi: 'Dewlete vana ma ambulansan erşawenê la nêverdenê.' la vejîya meydan ke ambulansê ke erşawitî seba birîndaran ney seba soremenîya tangan bîyî. Erdzemînan de sivîlî, hunermendî û muxabîrî estbî û pawitêne ke bixelisîyê. La Erdoganî bi vatişê terorîstî waşt ke qirkerdiş meşrû bikero. Çend rojan ra dima ma erdzemînê ke ameyî vêşnayene dîyî. Muxabîr Rohat Aktaşî ma rê fotografî erşawitbî la o zî amebi vêşnayene. Dewlete seba ke delîlê qirkerdişî çin bikera pêro xerbeyî eştî Çemê Dîcle ke tede parçeyê meyîtan zî estbî. Seserra 21 de ma zaf sucê vera merdimîye dîyî. Ma pêro dokumentî erşawitî dezgehanê Ewropa la dezgehêkî zî vera Erdoganî vengê xo nêvet. No kerdişê Ewropa etîk nêbi.''