26ê teşrîna peyêne ya 1993î ra nata Almanya de qedexeyê serê PKKyî est o.  Serkêşîya dezgehanê heqanê merdiman û rêxistinanê huqûqnasan de 18-19ê hezîrane de bi nameyê 'Qedexeyê Serê PKKyî yo 28 serre: Ma nika qisey kenê' forumêkê di rojan do bêro kerdene. Forum de ke paytextê almanya Berlin de do bêro kerdene mexdûrê qedexeyê serê PKKyî do qisey bikerê.

Forum hetê Yewîya Huqûqnasan a Heqanê Merdiman a Dinya û Demokrasî ya Ewropa (ELDH), Yewîya Huqûqnasan a Demokratîke (VDJ), Komeleya Heqanê Bingeyînan û Demokrasî, Komeleya Azadî û Komeleya Demokrasî û Huqûqî ya Mîyanneteweyîye (MAF-DAD) ra yeno serûberkerdene.

Forum do adresê 'Franz-Mehrîng-Platz 1' de bêro kerdene û tede  verî prosesê mehkemeya Dusseldorfî bêro ercnayene. Roja diyîne de zî huqûqnas û temsîlkarê dezgehanê heqanê merdiman do qisey bikerê.

Forumî ra verî Komeleya Azadîye ra Mehmet Demîrî ANFyî rê qisey kerd û pare kerd ke ê wazenê qala qedexeyî her kesî rê bikerê. Demîrî îfade kerd ke amadekarîyê forumî qedîyayî û vat: ''Almanya de 2 mîlyon kurdî est ê. Welatêkê winasênî de gelo sebebê nêzdîbîyayîşê na dişmenî têna slogan,, pankart, alaya ma yê? Yan zî sebebê bînî est ê? 

Ma wazenê forum de mexdûrê nê qedexeyî bêrê pêser. Hemserek, hemvervatox û xebatkarê dezgehanê ma yê sîyasîyan zî do forum de bibê. No forum sey perwerdeyêkî do bibo coka ma giranîye danê tewrbîyayîşî.''