Têgêrayîşê Ciwananê Şorişgêran ê NRW’yî bajarê Monchengladbachî yê Almanya de seba vîrardişê şehîdanê menga Gulane Festîvala Kultur û Sporî organize kerde. Pîya bi seyan Kurdistanijan xeylî enternasyonalîst û Almanî zî tewrê festîvale bîyî.
Bi nameyê Têgêrayîşê Ciwananê Şorişgêran Andok Tolhildanî qisey kerd û seba bicaameyîşê azadîya Rayberê Şarê Kurdî Abdullah Ocalanî veng da hemeyê ciwananê Kurdan ke mucadele bikerê.
Dimayê qiseykerdişê destpêkî ra koroya domanan vejîyaye sehne. Festîvale de Hozan Kawa, Hozan Lokman û Hozan Şemdînî hunerê xo pêşkêş kerd. Kurdistanijan û enternasyonalîstan bi deyîranê înan govende kerde. Seba domanan zî wareyêko taybet festîvale de ame amadekerdene û domain bi kayanê cîyayan kêfweş bîyî.
Tûrnûvaya futbolî de tîmanê bi nameyê Welatê Roja, Azadî Wuppertal, Enzigspor Velbert, Rojava Bonn, Welatê Roj Monchengladbach, Hevalspor 1 Euskirchen, Hevalspor 2 Euskirchen, Ozgur Gençlîk Gummersbach, Mezopotamya Essen, Azadî Attendorn û Amed Sporî seba serkewtişî kay kerd. Peynîya tûrnûvaye de tîmê Azadî Wuppertalî bi ser kewt. Xelata Faîr Play zî dîyaye Amed Sporî.
