Endama Merkezê Cigêrayîşanê Jineolojî û Edîtora Kovara Jineolojî Nagîhane Akarsela ke 4ê teşrîna verêne ya 2022yî de Silêmanî de hetê dewleta tirke ra amebî qetilkerdene, şaristanê Baselî yê Swîsre de ameye yadkerdene.

Merasîmê yadkerdişî de tim sloganê ''Jin, Jiyan, Azadî'' ameyî vatene. Dima derheqê Akarsele de panelêk ame kerdene.

Panel de hêverî rojnamegere Ronîye Eylem qisey kerd û qalê nasnameyê têkoşerî yê Akarsele kerd. Ronîye vat: ''Nagîhana ke mi şinasnaya bibî Kurdîstan.''

Dima sîyasetmedare Şukrane Sîncar îfade kerd ke cinîyê kurdî bi têkoşînî vurîyayê û bat: ''Nagîhane serkêşanê nê vurîyayîşî ra yewe bîye.''

Endama Akademîya Jineolojî Elîfe Kaya ard ziwan ke cinîyê sey Akarsel û Sakîna Cansiz ê tim hedefê dewleta tirke de yê. Elîfe vat: ''Anqara kişîyayîşê Nagîhane plan kerd û ard ca.La têkoşînê Nagîhane beno pîlêr û pêro cinîyan rê beno îlham.''

Akademîya Jineolojî ra Necîbe Qeredaxî pare kerd ke dewleta tirke û îxanetî Nagîhane kişta.

Dima Înîsîyatîfê Edaletê Seba Nagîhane Akarsel derheqê dosyaya dewa de agahîyî dayî û waşt ke wa kiştoxê raştikênî bêrê dîyene.

Nameyê TJK-E ser o Selma Surer pare kerd ke têkoşînê Nagîhane têkoşînê pêro cinîyan roşnî keno.

Yadkerdiş bi kilamanê Koma Kevana Zêrîn qedîya.