Qezaya Depî ya Xarpêtî de Newroze ameye pîrozkerdene. Pîya bi sîyasetmedare Gultane Kişanak wekîl û hemşaredarê DEM Partî û xeylê kesî bi kincanê xo yê neteweyîyan tewrê şayîye bîyî. Şayîye de govende ameye girewtene û sloganê “Bijî Serok Apo” û  “Bijî berxwedana zindanan" ameyî vatene.

Şayîye bi rêzgirewtişê şehîdan dest pê kerd. Dima ra Hemşaredaranê DEPî Songule Duzgun û Cafer Ogurî û Hemserekê DEM Partî yê Qeza Bekir Polatî qisey kerd.

Waya Mazlûm Doganî Arife Yildirim hêrişê vera elewîyan ke Sûrîye de yeno kerdene şermezar kerd û vat, ''Têkoşînê ma wa bibo wesîleya haştîye.''

Gultane Kişanak û wekîlanê DEM Partî bi slogana "Bijî Newroz" adrirê Newroze vist ta.

Wekîla DEM Partî ya Dêrsimî Aytene Kordu vat, ''Ma do bi vengdayîşê tarîxî her ca de adirê Newroze gir bikerê û têkoşînê xo xurtêr bikerê. Ma do pêro pîya nê welatî de haştîye înşa bikerê.''

Wekîlê DEM Partî yê Çewlîgî Omer Faruk Hulakuyî zî vat,  ''Adrio ke Mazlûm Doganî bi hîrê qirçanê kîbrîtî vist ta bi gir û heta ewro ame. O adir zîhnîyetê ke şarê kurdî nas nêkerdene ci rê bi cehenem. Ez Newroza Birêz Ocalanî pîroz kena ke bi vengdayîşê xo na Newroze dahîna kerd bimana.''

Gultane Kişanak zî  nê vatî: ''Birêz Ocalanî Îmrali de rixmê tecrîdê giranî bi cesaretê girdî berpirsîyarîye girewt xo ser. Nika ma sey şarî gerek na berpirsîyarîya ci pare bikerê, barî bigîrê milê xo ser. Hema bertengê krîtîkî est ê ke ma gerek tira ravêrê. Gerek nika îmkanî bêrê afirnayene ke Birêz Ocalan bieşko şertanê azadan de tewrê prosesî bibo. Ma têkoşînê xo xurt bikerê ke berê zîndanan bêrê akerdene. Nê prosesî de gerek ma pêro berpirsîyarîye bigîrê xo ser. Têna bi seykerdişî nêbeno.''