Nobeta Azadîye ya ke 25ê hezîrana 2012î ra nata şaristanê Strasbourgî yê Fransa de, seba azadîya Rayberê Şarê Kurdî Abdullah Ocalanî yena kerdene, hewteyê 593. de  hetê koma newî ameye dewrgirewtene.

Nobeta azadîye hewteyê 593. de hetê Komunê Arjîne Garzan ê Swîsre ra ameye dewrgirewtene. Koma ke Halise Tuzer, Naile Gumuştaş, Saadete Doymaz û Fahime Ozturk tede ca  genê, do 5ê teşrîna peyêne de nobete teslîmê komaya bîne bikera.

Çalakwanan ra Naile Gumuştaş vat tecrîdê serê Rayberê Şarê Kurdî Abdullah Ocalanî eynî wextî de vera cinîyan û kurdan yeno rayraberdene.

Halise Tuzer zî sere de Komîteya Vergirewtişê Îşkenceyî û Parlamentoyê Ewropa veng da dezgehanê eleqedaran ê mîyanneteweyî ke wa wezîfeyê xo bîyarî ca, şirê Tirkîya ser ke wa tecrîd bêro wedaritene. Tuzere azadîya Abdullah Ocalanî sey azadîya cinîyan û kurdan name kerd û vat ganî Ocalan cade bêro serbestveradayene.