Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê  Îşkenceyî ya Konseya Ewropa (CPT) de yena kerdene. 

Nobeta Azadîye hewteyê 452. de ya. Çalakîkerê nê hewteyî Şahîn Kaya, Murat Demîr, Îbrahîm Baş û Mahmut Yilmaz şaristanê Parisî ra yê. Şahîn Kayayî kome ser o qisey kerd û serkewtişê gerîlayan Garê rê selam kerd.

Kayayî vat: ''Rayberê ma 22 serrî yo tecrîdkerde yo. Heta ke Rayberê ma azad nêbo ma azad nêbenê. Armancê dewleta tirke têna qirkerdişê kurdan o. Ma Garê de zî no dî. ma vanê cayê çareserîye Îmrali yo. Mefteyê çareserîya meseleya kurdan Rayberê Şarê Kurdî Abdullah Ocalan o.''

Kayayî venga kurdan da ke wa wayîrê grevê vêşanîye yê tepişteyan vejîyê.