Nobeta Azadîye pê koma Drancyî dewam kena

Çalakîya nobeta ke seba azadîya Rayberê Şarê Kurdî Abdullah Ocalanî şaristanê Strasbourgî yê Fransa de yena kerdene, pê koma kurdistanijanê Drancyî dewam kena.

Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê  Îşkenceyî ya Konseya Ewropa (CPT) de yena kerdene. 

Hewteyê 454. de koma kurdîstanijan a Drancyî nobete dewr girewte. Vedat Çelîkî nameyê kome ser o qisey kerd û pare kerd ke kurdî 40 serrî yo seba azadîya xo xebitîyenê û heta serkewtişî do têkoşînê xo dewam bikerê.

Vedat Çelîkî vat: ''Rayber Apo pê komployêkî Tirkîya rê ame teslîmkerdene û eke hema zî azad nîyo no şermê pêro merdimîye yo.  Rayber Apo mefteyê çareserîya meseleya kurdan o.''

Çelîkî îfade kerd ke Ewropa sûcanê dewleta tirke mîyan kena nêvînena û giranîye dana menfaatanê xo.  Çelîkî grevê vêşanîye yê tepişteyan selam kerd û vat ganî CPT cade seba wedaritişê tecrîdî têbigêro. 

Çelîkî da zanayene ke ê do seba azadîya Abdullah Ocalanî têkoşînê xo dewam bikerê û venga pêro kurdan da ke seba azadîya ey wurzê payan ser û tewrê têkoşînî bibê.