Nobeta Azadîye ya ke seba azadîya Rayberê Şarê Kurdî Abdullah Ocalanî yena kerdene, 25ê hezîrane de kewena serra 11ine. Bi wesîleya serrgêra 10. ya çalakîya ke şaristanê Strasbourgî ya Fransa de, verê Konseya Ewropa de yena kerdene, kurdan ewro dest pê vilakerdişê vilawekan kerd.

Vilawekan de ame vîrvistene ke Ocalan 23 serran ra zêdeyêr o binê tecrîdî de yo.

Vilawek de wina ame vatene: ''Goreyê Peymana Heqanê Merdiman a Ewropa û pênaseyanê Neteweyanê Yewbîyayeyan tecrîd îşkence yo. Rixmo ke CPTyî eşkera kerd ke şert û mercê Îmraliyî nênê qebulkerdene û ganî bivurîyê tecrîdê vera Rayberê Şarê Kurdî ameyo girankerdene.Bi taybetî serra peyêne de cezayê dîsîplînî mojnenê ke dewleta tirke huqûqê mîyanneteweyî nêşinasnena. Labelê Konseya Ewropa wayîrê ê îmkanan a ke bi ambargoyan nê kerdişê dewleta tirke asteng bikera û wina yew wezîfeyê ci est o.''

Dostê şarê kurdî do roniştişanê Meclîsê Konseya Ewropa de vilawekan bidê parlamenteran û venga Konseya Ewropa bidê ke wayîrê mesuldarîyanê xo vejîyê.

23ê hezîrane de zî dostê şarê kurdî parlamenteranê Konseya Ewropa reyde seba Abdullah Ocalanî kombîyayîşê çapemenîye bikerê. Temamîya hewteyî de seba azadîya Ocalanî do nobete bêra girewtene.