Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê  Îşkenceyî ya Konseya Ewropa (CPT) de yena kerdene.

No hewte ciwanê bi nameyê Abbas Uce, Ozgur Aslan, Tansû Tek û Ronî Yûrtsever Parisî ra tewrê çalakîyî bîyî.

Nameyê kome ser o Ozgır Aslanî qisey kerd û ard ziwan de ê sey ciwanan seba azadîya Abdullah Ocalanî têkoşîn kenê. Aslanî îfade kerd ke pê rayîrê komployî yeno waştene ke têkoşînê edalet û azadîye bêro tasfîyekerdene. Aslanî venga pêro kurdan da serrgêra 22. ya Komploya Mîyanneteweyî de wa wurzê payan ser û azadîye biwazê.

Aslanî vat: ''Roja ma ya reşe a roj a ke Rayberê ma pê komployêk Tirkîya rê ame teslîmkerdene.''

Nobeta Azadîye her roje saete mabênê 08:30-17:00 de yena kerdene û çalakîya tewr derge ya kurdan a.