Paytextê Norveçî Oslo de verê Wezîrîya Karanê Teberî ya Norveçî de mîtîngêk ame kerdene û hêrişê dewleta tirke yê vera Rojawan û Mexmûrî ameyî protestokerdene.

Mîtîng de hêrişê Îsraîlî yê vera Gazze û hêrişê dewleta tike yê vera  Kurdîstanî ameyî protestokerdene û veng dîya hukmatê Norveçî ke wa semedê haştîye û çareser rolêk bîgêro xo ser.

Qiseykerdoxan bale ante şerê leyminî yê dewleta tirke yê vera Rojawan û Mexmûr ser û vat, têna 4ê teşrîna verêne ra heta nika 50 kesî ameyî qetilkerdene û vist vîrî ke cayê sey tesîsê elektrîkî, depoyê awe, nêweşxaneyî û warê sîvîlan yenê bombardumankerdene. Mîtîng de veng dîya hukmatê Norveçî ke wa bi rayîrê Neteweyanê Yewbîyayeyan û NATOyî şiro Tirkîya ser ke verê nê hêrişan bêro girewtene û seba ke huqûqê şerî yê mîyanneteweyî ameyo binpaykerdene, wa Tirkîya bêro muhakemekerdene.