Platformê cuye yo vera tecrîdî bi slogana “Ma do grevê vêşanîye yê Leyla Guvene û ê embazanê aye rê wayîrîye bikê” ame ronayene. Endamanê platformî bi beyanatê çapemenîye awanbîyayîşê platformî îlan kerd.

Platform hetê sazî û dezgeyanê sey, ACTIT, CDK-F, HDK-A, ADHK, Fransa Partîzan, SYKP, TJK-F, SKB, FEDA, CÎK û Keyeyê Şarî yê Pazarcik-Elbîstanî ame ronayene.

Platform seba ke paştdarîye bidîyo çalakîyanê Leyla Guvene, girewteyê hepisxaneyan, Ewropa û Tirkîya ameyo ronayene û beyanatê platformî de wina ame vatene: “Xeylî sazî û kesê Ewropa, heta ewro bi xeylî çalakîyanê xo paştdarîye daya çalakîyanê vera tecrîdî û xoverdayoxan rê wayîr vejîyayî. La prosesê nikayî de nê paştdarîyî kêmî manenê. Ma ganî seba ke vengê mucadeleyî hîna bibo berz û talebê xoverdayoxan bêrê qebûlkerdene, mucadeleyê yewbîyayeyî esas bigîrê û no hedefe ma yo. Ma do bi nê hedefî tê bigêrê û bibê vengê çalakîyanê grevê vêşanîye, tecrîdî bişiknê.”

Beyanat de ame vatene ke şikitişê tecrîdî ancax bi mucadeleyê yewbîyayeyî mumkun o. Platform bi beşdarîya 18 endaman, lokalê Merkezê Komelê Kurdan ê Demokratîkî yê Parîsî de ame îlankerdene û nê endamî seba ke paştdarîye bidê çalakîyanê grevê vêşanîye kewtî grevê vêşanîye yê 3 rojan.