Paytextê Fransa Paris de seba şermezarkerdişê Komployê 15ê Sibate yê vera Rayberê Şarê Kurdî Abdullah Ocalanî rayraşîyayîşo derg ê hîrê rojan ame destpêkerdene.

Rayraşîyayîşo ke rayberîya Konseya Kurdan a Demokratîke ya Fransa (CDK-F) û Têgêrayîşê Cinîyan ê Kurdan ê Fransa ( TJK-F) de ame organîzekerdene  bi sloganana 'Ocalanî rê azadîye' dest pêkerd.

Sereka Şarederîya Villeneuve Saint Georgesî Sylvie Altman ke aktîvîte de qisey kerd vat ganî têkoşînê kurdan ê vera DAÎŞî nêro vîr ra kerdene û waşt PKK lîsteya terorî bêro vetene û Ocalan serbest bêro veradayene.

Endamê Heyetê Dîwanê KCDK-E Murat Ceylan îz komplo şemezar kerd û vat bi nê komployî ame waştene ke fîkrê Rayber Apoyî bêrê hepskerdene la hemrayanê Rayber Apoyî yê qehremanan bi xoverdayîşî no komplo pûç vet.

Rayraşîyayîşê hîrê rojan de do xeylêk dezgehan de derheqê Rayberê Şarê Kurdî Abdullah Ocalanî de pêvînayîşî bêrê kerdene û dosyayî bêrê dayene. Rayaşîyayîşo derg do roja yewşeme Meydanê Republique de bi mîtîngêk biqedîyo.