Parlamenterê Partîya Çepe Danîel Rîazat û endama Heyetê Rayberdişî yê Forumê Çepî Yekbûn Alpe seba paştîdayîşê Leyla Guvene û çalakwananê bînan ê ke semedê tecrîdê serê Rayberê Şarê Kurdî Abdullah Ocalanî bêro wedaritene kewtbî grevê vêşanîye, Parlamentoyê Swêdî de dest bi grevê vêşanîye kerd.

Rîazatî û Alpe vero ke dest bi grevê vêşanîye bikerê Parlamento de kombîyayîşêkê çapemenîye viraşt. Rîazatî ard ziwan ke dinya çîyanê ke Tirkîya de qewimîyenê rê bêveng a û seba ke ê na bêvengîye biqedînê pîya bi Yekbûn Alpe dest bi grevê vêşanîye yê 3 rojan kenê.

Rîazatî vat ke Partîya Çepe ya Swêdî tim paştî dana Têgêrayîşê Azadîye yê Kurdan û HDP’yî rê zî paştî dana û vat, “Her çende ke Swêd de grevê vêşanîye metodêkê mucadeleyî yê aşînayî nêbê zî halo ke Tirkîya de yo alelade nêyo, heqê merdiman yenê binpaykerdene û seba ke ma nizdbîyayîşê Tirkîya protesto bikerê kewenê grevê vêşanîye.”

 ‘GANÎ HUKMATÊ SWÊDÎ PAŞTÎ BIDO GREVKERDOXANÊ GREVÊ VÊŞANÎYE’

Yekbûn Alpe vat ke Swêd de hewna zî demokrasî esto û heqê merdiman rê rîyaet yeno kerdene û naye ra înan grevê vêşanîye Parlamentoyî de dayo destpêkerdene û nê vatî:

“Ma seba ke Parlamentoyê Swêdî hemverê grevanê vêşanîye de bêveng maneno tîya grevê vêşanîye danê destpêkerdene. No grevê vêşanîye sseba demokrasî, heqanê merdiman û aşitî yo. Tecrîdo ke serê Rayberê Şarê Kurdî Abdullah Ocalanî de yeno bicaardene hemverê heme qanûnanê mîyanneteweyîyan de yo. Eke Swêd û Yewîya Ewropa derheqê heqanê merdiman de samîmî yê ganî tavilî hemverê binpaykerdişê heqanê Kurdan de vengê xo bikerê berz û Tirkîya ser o zextan bikerê. Heman wextî de biwazê ke tecrîd bêro wedaritene.” 

 ‘MA DO PÎYA BÊVENGÎYE BIQEDÎNÊ Û TECRÎDÎ WEDARÊ’

Alpe sere de Leyla Guvene heme çalakwanan silam kerdî û vat: “Leyla Guvene sembolê mucadeleyê azadîye yê cinîyan ê Kurdan a. Ma do pîya na bêvengîye biqedînê û tecrîdî wedarê. Zextê Erdoganî çende vêşî benê wa bibê, ma êyê ke aşitîye pawenê do bi ser bikewê.”

Parlamenterê Partîya Karkeran a Sosyal Demokrate Kadir Kasirgayî zî bi tewrbîyayîşê kombîyayîşî paştî daye çalakwanan. Kasirgayî ard vîrî ke ê zî sey Partîya Çepe grevê vêşanîye ardê rojdemê Parlamentoyî. Kasirgayî vat halê Leyla Guvene krîtîk o û bi nê cumleyan reaksîyon da Tirkîya:

“Qewimîyayîşê ke Tirkîya de yê heme hetêkê eksîyî ser o yê. Tirkîya de îdareyê yew kesî yo otorîter esto. Her çîyî rê Erdogan qerar dano. No wina nêşino. Swêdo ke welatanê tewr averîperweran ra yo tewr vernî problemê Kurdan ardibi rojdemê Ewropa. Abdullah Ocalan tena yew tepişte nêyo, rayberêk o ke pêvînayîşanê mabênê Tirkîya û PKK’yî de rolêko merkezî kay kerdo.”

Dimayê qiseykerdişan ra Rîzaat û Alpe tîşortê ke ser o resimê Leyla Guvene estbi dayî xora û dest bi grevê vêşanîye kerd.

'GANÎ TECRÎD WEDARÎYO, TEPIŞTEYÊ SÎYASÎYÎ SERBEST BÊRÊ VERADAYENE'

Ma derheqê grevanê vêşanîye de û tecrîdo ke serê Ocalanî de yeno bicaardene de tayê sîyasetkar û hunermendan ra fikrê înan persayî. Partîya Çepe ra Lorena Vargas Delgadoyî vat, “Ganî ma tepiştişanê ke hetê Tirkîya ra yenê kerdene û zextanê aye bi hawayêkê xurtî protesto bikerê. Ganî Tirkîya tavilî tecrîdê ser3e Ocalanî wedaro û tepişteyanê sîyasîyan serbest vera bido.”

Resam û Karîkaturîst Lennart Aspî zî vat, “Seba ke PKK lîsteya terorî de ca gêno dinyaya teberî hemverê tecrîdî de bêveng manena. Welatê Ewropayijî tesenê ke Erdogan multecîyan bieşrawo Ewropa.”

Endamê Meclîsê Şaredarîya Stockholmî Rodrigo Arceyî vat, “Tirkîya de xeylî HDP’yîyî zîndanan de yê. Parlamenter û şaredarê ke hetê şarî ra ameyê weçînayene fînîyenê zîndanan. Ma Tirkîya ra wazenê ke heqanê tepişteyan rê rîayet bikero û verdo ke keye û avûkatê înan înan dir pêvînayîşan virazê.”