Seba ke grevanê vêşanîye rê paştdarîye bêro dayene, 2 yê Adare de, bajarê Almanya Koln de mîtîng do bêro organîzekerdene. Platformê Cuye yê vera Tecrîdî yê Ewropayî yew beyanato nuştekî da û bale ante rewşa weşîya xoverdayoxan a asta krîtîke ser.

Platformî bale ante bêvengîya hukmatanê Ewropa ser û beyanatê xo de wina va: ”Xeylî têkilîyî ameyî viraştene la qet yew parlamento û welatî de grevê vêşanîye nêameyî rojdem. Hukmatê Almanya bi vatişê xo yê “Ma zî çapemenîye ra heşnayo”, nîyetê xo yo necidî kerdo eşkera. Ewropa bi nê ferasetê xo dirîyîya xo dana teber.  Wexto ke vera hukmatan yew çi biqewimîyo hema qalê demokrasî û heqanê merdiman kenê, la babete ke grevê vêşanîye bê bêveng manenê û paştdarîye danê dîktatorîya AKP’yî.”

Beyanat de seba ke şar beşdarê mîtîngê 2’yê Adare yo ke Koln de do bêro organîzekerdene bibo vengdayîş ame dayene. Beyanatê Platformî de wina ame vatene: ”Leyla Guvene bi qerardarîye grevê vêşanîye domnena û rewşa xo başe nîya. Rewşa Nasir Yagizî û ê xoverdayoxanê Strasbourgî zî bîya girane. Na rewşa winasîye de bêveng mendiş yeno manaya temaşekerdişê mergê Leyla Guvene û embazanê aye. Mehmet Tunç hîna ke nêamebi qetlkerdene vatbi, “Destê kamî ra ke çi yeno ganî nika bikero”. Ganî ma zî bi şîarê Mehmet Tunçî, wayîrê xoverdayoxan bivejîyê.”

Mîtîng do 2’yê Adare roja Şemeyî saet 11 de Koln Eberplatz de bi rayîrşîyayîşî dest pê bikero û mîtîngêko merkezî bêro viraştene.