Şaristanê Stuttgartî yê Almanya de serkêşîya Platformê Vera Qirkerdişî yê AGÎFî, Dezgehanê Koçberan ê Tirkan û AVEG-KONî de çalakîyêke ameye kerdene. Çalakîye de venga hukmatê Sûrîye dîya ke wa qirkerdişî vindarno û HTŞyî ra hesabê qirkerdişî bêro persayene.

Paytextê eyaletê Vorarlbergî yê Avusturya yê Bregenzî de qirkerdişê elewîyan ame şermezarkerdene. Çalakîye de eşkerayîyê bi kurdkî, tirkî û almankî ameyî wendene. Qiseykerdişan de ame vatene ke kurdî tim hetê elewîyan de yê û modelê Îdareyê Xoserî seba elewî û durzîyan modelo tewr raşt o.

Şaristanê Kielî yê Almanya de serkêşîya FEDA, Komelê Demokratîkî yê Kurdan, Meclîsê Cuya Cinîye, Yewîya Cinîyan a Kielî de çalakîyêke ameye kerdene. Çalakîye de venga dewletanê Ewropa dîya ke wa qirkerdişê HTŞyî yê vera elewîyan vindarnê.

Şaristanê Baselî yê Swîsre de serkêşîya ADGByî de çalakîyêke ameye kerdene û eşkerayîye ameye wendene. Eşkerayîye de dîya zanayene ke HTŞyo ke Erdogan paştî dano ci, elewîyan qir keno.

Şaristanê Cenevre de zî verê Ofîsê Neteweyanê Yewbîyayeyan (NY) qirkerdişê elewîyan ame protestokerdene. Tîya de eşkerayîye zî ameye wendene. Eşkerayîye de ame parekerdene ke Sûrîye de elewîyî yenê qirkerdene û ganî NY verê nê qirkerdişî de vengê xo bikero. Eşkerayîye de ame waştene ke wa NY vera Erdoganî tewir bimojno ke o paştî dano HTŞyî.