Rahmanîyî derheqê polîtîkaya dewleta tirke ya Rojhelatê Mîyanênî û tewirê şarê kurdî û Rojawanî de ANF reyde qisey kerd.

Rahmanîyî da zanayene ke pîlbîyayîşê şerê Sûrîye de pareyê Erdoganî û dewleta tirke zêde yo û vist vîrî ke destpêkê şerê zereyî ra natya Îstanbul de seba îqtîdarî ra dûrvisnayîşê Esadî konferans yeno kerdene.

Rahmanîyî vat: "Armancê Erdoganî no yo ke Sûrîye de ca bido ereban û bi nê hawayî asteng bikero ke mabênê Başûr û Rojawanê Kurdîstanî de têkilîyêk biba. La heta nika nêeşkîya ser bikewo. Tirkîya Îdlib de kewte tengasîye. Komê El Qaîde yê ke Tirkîya paştî dana înan rewşêka zehmete de yê. Coka Tirkîya qels bîye.

Erdoganî şerê Sûrîye de 8 serran paştî da komanê cîhadîstan û çeke daye înan. Erdogan plan keno ke nê cergan bierşawo Lîbya."

Rahmanîyî bale ante ser ke Rûsya goreyê menfaatanê xo Lîbya de têgêrena. La Erdogan û Xamaney goreyê îdeolojîyanê xo yê têgêrenî û naye ra paştî danê komanê cîhadîstan. Rahmanîyî vat: "Erdogan Serekdewletê verênî yê Misirî Muhammed Mursî rê hemkarîye kerde. Çunke o zî terefgîrê Îxvanî bi. Bi heman hawayî paştî dano Îxvanê Lîbya."

Rahmanîyî eşkera kerd ke seba Erdoganî û dewleta tirke mesela veêne serkewtişê kurdan o û wina dewam kerd: "Dewleta tirke 40 serr ê ke hêrişê kurdan û PKKyî kena. Labelê waştişê şarê kurdan esto. Erdogan wexto ke dî prosesê haştîye de kurdî bîyî xurtêr û 80 wekîlê HDPyî parlamento de estê tersa û dest pê tepiştişê şaredaranê HDPyî kerd. Erdogan Rojawanî ra hîna zêde rewşa Tirkîya û Vakurê Kurdîstanî ra terseno. Her kes zaneno ke Rojawan Tirkîya rê gef nêwerd. Erdogan terseno ke sîstemê Rojawanî Vakur û Rojhelatê Mîyanênî de vila beno.

Şarê Rojawanî nika vera îşxalê dewleta tirke xo ver dano. Sîstemê Rojawanî bî hêvîya bindestanê dinya. Ganî pêro şarê bindestî paştî bidê Rojawanî ke vera îşxalê dewleta tirke xo ver dano."