Temsîlkarê HDP'yî yê Konseya Ewropa Faîk Yagizayî derheqê xebatanê xo yê vizêrî yê ke zereyê Yewîya Ewropa û Konseya Ewropa de zanayîş da. Yagizayî va: Pêvînayîşê ma û parlamenteranê Parlamentoyê Ewropa CPT’ yî reyde estî. Waştişê ma û parlamenteran yew o. Ma waşt tecrîdkerişê Rayberê Şarê Kurdî Abdullah Ocalanî bêro wedaritene, îmkanê ci bêro viraştene ke keye û avûkatanê xo reyde pêvînayîşan bikero, heqê nuştişê mektube û telefon ci rê bêro dayene ke nê zî raporê CPT’î de ameyê bewlîkerdene û Meclîsê Parlamenteran ê Konseya Ewropa de ameyî qebûlkerdene. Nêzdîbîyayîşê CPT’yî pozîfît o û parlamenteranê Parlamentoyê Ewropa zî nîyadayîşanê bi eynî rengan pare kenê.’’

Yagizayî  raporê serê Tirkîya yo ke vizêr şan de ame raydayene zî ercna û da vat ke raporê 2019’î  serra 2005‘î ra nata mabênê raporan ê ke ameyî amadekerdene de raporêko tewr wişk o. Yagizayî ard vîrî ke, Parlamentoyê Ewropa pêşnîyarê Konseya Yewîya Ewropa kerd ke Tirkîya reyde têkilîyan biwedarê û vat, “Qerar yê Konseya Yewîya Ewropa yo. Labelê tewirê Parlamentoyê Ewropa yê bi nê rengî, hem pozîsyon û tewirê rayapêroyî yê Ewropa yê vera Tirkîya ramojneno, hem zî şanena verê çiman ke Tirkîya zereyê rewşêka senêne de ya.”

Temsîlkarê HDP'yî yê Yewîya Ewropa Eyup Doru zî derheqê karanê xo de zanayîş da. Doruyî ard ziwan ke, seba ke weçînayîşanê cayîyan ê 31’ê Adare de heyet Tirkîya rê bêro şawitene vengdayîşî ameyî kerdene û vat, “Rapor de rewşa sîyasî ya Tirkîya, kerdişê antî demokratîkî yê vera HDP’yî ameyî ercnayene.