Raportorê Tirkîya yê Meclîsê Parlementeran ê Konseya Ewropa (AKPM) Stefan Schennachî 11-14ê hezîrana 2024î de Tirkîya zîyaret kerdbî. Stefan Schennachî derheqê zîyaretî de raporê xo eşkera kerd. Raporo ke hetê Stefan Schennach û Jill Mortimerî ra ameyo amadekerdene tede bale ameye antene tecrîdê vera Rayberê Şarê Kurdî Abdullah Ocalanî ser.

Rapor de Stefan Schennachî pare kerd ke Rayberê Şarê Kurdî adara 2020î ra nata keyeyê xo nêdîyo û tewr peyêne bi telefonî adara 2021î de birayê xo de qisey kerdo û tebaxa 2019î ra nata zî avûkatê xo nêdîyê.

Rapor de ame parekerdene ke raporê Komîteya Vergirewtişê Îşkenceyî (CPT) seba ke Tirkîya destûr nêdana nêweşanîyayê.

Rapor de dîya zanayene ke zîndanê Tirkîya zaf qerebalix ê, wextê tepişîyayîşî û cezayanê zîndanî derg ê.

Rapor de ca dîya rewşa Hemserekê HDPyî yê verênî Selahattîn Demîrtaşî û Osman Kavalayî û rewşa tepişteyanê nêweşan ser.

Rapor de ame dîyarkerdene ke zîndananê Tirkîya û nezaretan de îşkence û kerdişê xirabî zêdîyayê û mergê tepişteyanê Tîpê Fyî ameyî vîrvistene.

Rapor de ame vatene ke Tirkîya biranê Mehkemeya Heqanê Merdiman a Ewropa (MHME) nêana ca.

Stefan Schennachî rapor de ard ziwan ke ey pêvînayîşanê xo yê Anqara de vato ke caardişê biranê MHME mesuldarîya Tirkîya ya û venga meqamanê Tirkîya da ke seba ke biranê serê Kavala û Demîrtaşî  ca bîyara cade tedbîran bigêrê.

Stefan Schennachî polîtîkayê destsernayîşî yê vera şaredarîyanê HDP û DEM Partî zî ercnayî û vat ke ey derheqê na babete de selahîyetdaran de pêvînayîşî kerdê.