Akademîsyenê Zanîngehê Cambridge yê Îngilîstanî Dr. Thomas Jeffrey Miley û Akademîsyenê Zanîngehê Udine yê Îtalya  Dr. Federico Venturiniyî serra 2018î de kitabê bi nameyê ''Your Freedom and Mine: Abdullah Öcalan and the Kurdish Question in Erdogan's Turkey'' weşanabi û kitab hetê Weşanxaneyê Black Rose ra amebi çapkerdene. Kitab de bale yena antene ser ke çareserîya meseleya kurdan de rolê Rayberê Şarê Kurdî Abdullah Ocalanî çend girîng o.

Kitab par açarîya erebkî û paytextê Misirî Kahîre ra erşawîyabi Almanya. La Meydanê Teyerayan ê Dusseldorfî de 13ê teşrîna verêne de gumrik de seba ke serê kitabî de rîyê Rayberê Şarê Kurdî Abdullah Ocalanî ame xêzkerdene dest nîya 500 kitaban ser. Gumrikî derheqê adresê teslîmatî yê kitaban de zî tehqîqat akerd.

Almanya serranê peyênan de pê xeylêk qedexeyê vera Rayberê Şarê Kurdî Abdullah Ocalanî balan ancena. 2ê adara 2017 û 29ê çeleyê 2018î de zî 16 eyaletan de sembolê sîyasî yê kurdan, sembolê PKKyî ameyî qedexekerdene, azadîya fikr û îfadeyan ameye binpaykerdene.

Wezaretê Karanê Almanya têna destûr da ke eke fotografê Ocalanî PKK îfade nêkerê têna rewşa ci ya zîndanî  nîşan bikerê eşkîyenî bêrê kiriştene.

Reyna fotograf, sembol, xêz, dîmen û vengê Rayberê Şarê Kurdî Abdullah Ocalanî zî 16 eyaletan de ameyî qedexekerdene.

Rixmê hende qedexeyan zî kurdî û dostê înan fotografê Rayberê Şarê Kurdî kirişenê û sloganê 'Biciwîyo Serek Apo' vanê.