Medîco Internatîonal o ke dezgehê heqanê merdiman o û merkezê ci Almanya de yo, bi nameyê ‘Verê xezebî bigêrî’ dest kampanyayêk kerde. Kampanya de bale ante serê hêrişanê dewleta Tirkî yê serê Rojawanê Kurdistanî û Vakûrê Sûrîye. Hukmatanê Ewropayî ra ame waştene ke vera hêrişan û felaketêko merdimî yo ke nêtîceyê nê hêrişanê winasîyan do bivejîyê, tedbîran bigêrê.

CAYO KE ROJAWANIJÎ TEDE BIMANE Û XO BIPAWÊ ÇIN O

Seba kampanyaya ke bi cehdkerişê Medîco Internatîonalî dest pê kerda, deklarasyonêk ame weşanayene. Deklarasyon de serra 2014 de hêzanê YPG û YPJ'î cimatê Êzidîyan hovîtîya DAÎŞ'î ra xelisnayê û ame vatene, şerê vera DAÎŞ'î de nêzdîyê 10 hezar şerwananê Kurdan canê xo dayo. Deklarasyon de dîya zanayene ke, dimayê hêzanê DYE'yî da eşkerakedene ke ê do herême ra biancîyê, dewleta Tirkî  vera Rojawanî û Vakûrê Kurdistanê Sûrîye dest bi tehdîtan kerd û no vengdayîş ame kerdene:

 "Bi fermanê Erdoganî nêzdîyê 80 hezar eskerê Tirkî serê sînoranê Sûrîye de ameyî cakerdene. Tehdîto gird ê şerî serê herême de esto. Şerêkê bi nê rengî do verê felaketêk merdimî û sîyasî yê herême abikero. Ma Ewropa ra wazenê ke seba şerêko winasî nêbo, çîyêk bikera. Eke cehdkerdişêk seba îşxalkerdişê Rojawanî bêro kerdene, na raye sey hêrişê Çele ya 2018’î yo ke serê herêma Kurdan Efrînî ra bi îxlalkerdişê qanûnê mîyanneteweyî ameybi kerdene do bêro kerdene. Dimayo ke dewleta Tirkî û çeteyanê ci Efrîn îşxal kerd, 100 hezar ra zêdeyî merdimî a herême de mexdûr mendî. Hêrişê vera Rojawanî de cayo ke merdimî tede bimane û xo bipawê çin o, çunke Rojawan herêma tewr biasayîş a. Ganî serkêşîya îdareyanê demokratîkî yê Rojawanî û Vakûrê Sûrîye yê ke zaf şarê cîyayê etnîkî ameyê têhet, heme rayîrê dîplomatîkî bêrê bikarardene û verê felaketêk hîrayî bêro girewtene. Herinda qedexekerdişê sembolanê Kurdan de ganî seba merdimanê ke ameyê Almaya û Ewropa înan rê zext nêro kerdene û garantî bêro dayene.”

Kesanê ke morê xo eşto binê kampanyaya Medîco Internatîonalî:

Elfrîede Jelînek (Nuştox, Awûstûrya),

Axel Honneth (Fîlozof / Almanya-DYE),

Mîlo Rau (Rejîsor, nuştoxê şanoyî / Swîsre-Belçîka)

Leyla Îmret (Hemşaredara Cizîrî ya ke wezîfeyî ra ameya girewtene),

Gesine Schwane (Zanyara siyasetî)

Nancy Fraser (Fîlozof / DYE)

Vîvîenne Westwood (Dîzayner / Îngilistan),

Sandro Mezzadra (Zanyarê sîyasetî / Îtalya),

Étienne Balîbar (Fîlozof/ Fransa)