Partîya Sosyala Demokrate a Almanya ke Xirîstîyananê Demokratan ê Angela Merkel reyde hukmatê federalî îdare kena, 9ê gulane de do kongreya xo bikera. Kongre de so seba weçinîtoxanê federalan ê 26ê êlule bernameyêkê weçînayîşî do bêro amadekerdene. Seba kongre Rêxistina Partî ya Eyaletê Berlinî pê serrnameyê 'Paştdayîşê Rojawanî' vernîyazêk pêşkêş kerd.

Vernîyaz hêrişanê îşxalî yê dewleta tirke ser o vindeno û Angela Merkel ra yeno waştene ke vera nê hêrişan tewir bigêra. Vernîyaz de Îdareyê Xoserî ser o agahîyê zêdeyî zî dîyenê. Vernîyaz de ame parekerdene ke hêrişê dewleta tirke têna huqûqê mîyanneteweyî binpay nêkeno herême de zî beno sebebê bêhuzurîye. Vernîyaz de bi 20 madeyan nê çîyî yenê waştene:

-Tirkîya rê çekî nêrê rotene.

-Alamanya seba qedînayîşê hêrişanê dewleta tirke yê vera Rojawanî têbigêra.

-Erdogan hînî nêro fînansekerdene

-Seba haştîya Sûrîye wa xîret bêro kerdene.

-Seba muhakemekerdişê DAÎŞijan ganî mehkemeyî bêrê ronayene.

-Îdareyê Xoserî reyde têkilîye bêra ronayene.

-Partîya wayûbirayî ya SPDyî CHPyî rê teda bêra kerdene ke seba qedînayîşê nê hêrişan têbigêro.

-Peynîya sîyasetê krîmînalîzkerdişê kurdan wa bêra ardene.