Hetkarê Serekwezîrê Eyaletê Hessenî Kawa Mansouri û Endamê Meclîsê Federalî yê Almanya Armand Zorn ke tewrê Newroza Frankufurtî bîyî derheqê Newroze û vendayîşê  tarîxî yê Rayber Apoyî de ANFyî rê qisey kerd.

Kawa Mansouriyî Newroza şarê kurdî pîroz kerd û nê vatî: ''Ez her serre tîya tewrê Newroze bena. Zaf kesê ke emser tewrê na festîfale bîyî, kultur kurdan nas kenê. No zaf muhîm û rind o. Ez zî Îranî ra ya, komelê ma de no roşan cîya yeno pîrozkerdene. Coka semedê mi zaf muhîm o ke ez ewro tîya de ya.''

Armand Zornî zî vengdayîşo tarîxî yê Rayber Apoyî sey ''gama cesûre'' name kerd, vat: ''Gerek hukmatê tirkî berpirsîyarîya xo bîyaro ca ke na game bêro dewam kerdene û verê haştîye bêro akerdene.  Almanya tim mabênçîya hol a. Ma eşkenê nê hetî ra paştî bidê. Eke hewce bikero ma eşkenê pirdan ronê. Seba ke no proses bêro domnayene gerek hukmatê tirkî îradeyê cîdî ramojno. Gerek pêvînayîşî eşkera û pê gamanê pêtan berê kerdene ke semedê perûne haştîye bêro caardene. Gama verêne ameye eştene la na qetî qîm nêkena. Têkoşînê kurdan îlhan dano mi.''