Yewîya Weçînayoxan a Schleswigî (SSW) ya ke serekîya ci Flemmîng Meyer keno Eyaletê Schleswig-Holsteinî de ya. SSW seba heqanê danîmarkayîjan û şarê frîzî têkoşîn keno. SSWyî muracat kerd û waşt ke qedexeyê PKKyî yo ke serra 1993î ra nata yeno kerdene bêro wedaritene û PKK lîsteya terorî ra bêro wedaritene.

SSWyî derheqê babete de murcatê Meclîsê Eyaletê Schleswig-Holsteinî kerd û wazeno ke meclîsê eyaletî seba babete peynîya sibate de bêro pêser. SSW wazeno ke seba ke qedexeyê PKKyî bêro wedaritene tedaya hukmatê Almanya bêra kerdene û Tirkîya rê ambargoyê çekan bêro caardene.

Serekê Pêroyî yê SSWyî Flemming Meyerî derheqê babete de qisey kerd û ard ziwan ke qedexeyê PKKyî asteng keno ke kurdî entegreyê Almanya bibê. Meyerî îfade kerd ke qedexeyê PKKyî yeno a mana ke Almanya verê Tirkîya de çok dano erdî ro.

Meyerî da zanayene ke kurdê Almanya bi nameyê ''terorîstî'' komelî ra yenê dûrvistene û vat: ''Mi zîyaretanê xo yê herêma kurdan de dî ke kurdî pê rotişê çekanê Almanya yê seba Tirkîya qayîl nîyê. Hînî ganî nê dewirê çekan biqedo.''