Semedê azadayî Rayberê Şarê Kurdî Abdullah Ocalanî ewro bajarê Strarbourgî yê Fransa de çalakîyêka xurte ameye kerdene. Mîtîngo ke 14 dezgehî tewrê ci bîyî de veng dîya dezgehanê eleqedaran ê welatanê Ewropa ke wa berpirsîyarîya xo bîyarî ca.

Hemserekê Kongra Gelî Remzî Kartalî ke mîtîng de qisey kerd nê vatî: ''Ganî Konseya Ewropa ganî cade raporanê CPTyî bigîro çiman ver û semedê qedînayîşê îşkenceyê Îmraliyî yo ke 23 serrî yeno domnayene, înîsîyatîf bîgiro. Şarê kurdî û dostê înan vanê hinî bes o. Semedê çareserkerdişê heme probleman ganî Ocalan cade bireso azadîya xo. Semedê naye zî ganî dezgehê eleqedarî yê Ewropa perbirsîyarîya xo bîyarê ca.''

Ronayoxanê Kampanyaya 'Ocalanî rê Azadîye' ra Simon Dubbinsî zî Nobeta Azadîya ya ke bi serran o yena domnayene selam kerde û vat: ''Ma îngîlîstan de 6 roniştişan ra konferansêk kerd. Konferans de ciwanêkî vat ê nêzana Birêz Ocalan weş o yan nê û ma ra persa vat: ''hayîya şima pê esta?'' Nê persî gonîya ma cemidnaye. Nika muxatabê nê persî heme dezgehê ke nê îşkenceyî kenê ê yê. Hema ke zaf erey nêbîyo ganî cade semedê pêvînayîşanê Ocalanî çîyêk bêro kerdene.'' Dubbinsî ard ziwan ke Îngîlstan de 6 mîlyon endamê sendîkayê înan estê û ê selamê nînan pêrune Abdullah Ocalanî rê ardî.

Temsîlkara Kampanyaya 'Ocalanî rê Azadîye' ya sendîkayanê Îngilîstanî Clare Baker zî ard ziwan ke Abdullah Ocalan Rojhilatê Mîyanênî de ewro hetê xeylêk şaran ra sey rayberêkî yeno qebulkerdene û vat: ''Azadîya ey azadîya nê şaran a.'' Bakere vat: ''Abdullah Ocalano ke 23ê serrî yo Îmrali de yeno tepiştene kîlîtê heme problemanê Rojhilatê Mîyanên o.''

Komîteya 'Ocalanî rê Azadîye' ya Îtalya ra Prof. Laura Corradi zî vat: ''Ma pêro zanê ke Abdullah Ocalan netîceya kompoloyê mîyanneteweyî de şawiya îşkencexaneyê Îmraliyî. Seba ke  Îtalya û xeylêk welatan xîyatenê kurdan û Ocalanî kerd, rewşe heta ewro ameye. Ewro semedê Afrîkaya Başûre senî manaya Mandella esta, semedê Rojhilatê Mîyanênî zî manaya Abdullah Ocalanî eynî ya. Coka siba yan zî cuwa pê nê, cade nika Ocalanî rê azadîye.''

Temsîlkara TJK-E Besîma Konca zî xoverdayîşê Herêmanê Pawitişî yê Medya û Şingalî yê ke raştê hêrişê dewleta tirke û PDKyî yenê, selam kerd û vat: ''Înanê ke Lozan de Kurdîstan kerd çar leteyî, ewro zî tecrîdî danê domnayene.  Ewro koyê Kurdîstanî yenê vêşnayene û kurdî yenê qetilkerdene û raştê qirkerdişan yenê. Ma do verê nê hêrişan de milê xo çewt nêkeno. Ma do reyberê xo bikerê azad û şaranê Rojhilatê Mîyanênî bixelisnê.''

Badê qiseykerdişan govende ameye girewtene. Dima ra ver bi Meydanê Arnoldî rayraşîyayîş amekerdene. Ciwanan verê Dêrê St.Maurice de bi xeyman dewa komune naye ro.  Tîya do mengêke nobete bêro girewtene. Nobeta ke 200 ciwanî tewrê ci benê de do aktîvîteyê cîya cîyayî bêrê kerdene.