Çalakwanê ke semedê Azadîya Rayberê Şarê Kurdî Abdullah Ocalanî Ewropa de 162 rojî grevê vêşanîye de mendî  vera tecrîdî Strasbourg de kombîyayîşê çapemenîye viraşt.

Çalakîya ke verê Konseya Ewropa de ameye viraştene parlamenterê Parlamentoya Ewropa Momodou Malcolm Jallow, Roberto Rampi, Konstantinos Efstathiou û Gokaye Akbulut û parlamenterê verênî yê HDPyî Faysay Sariyildiz û Nursele Aydogane tewrê ci bîyî.

Pîya bi çalakwananê Strasbourgî Huseyîn Yildizo ke Den Haag de kewt grev,  Mustafa Tuzak o ke Almanya ya de grev de bi kombîyayîşî de cayê xo girewt. Çalakîya grevê vêşanîye yê bêdem-bêagêrayîşî 17ê kanûn a 2018î de dest pêkerde 162 rojî kerdbi derg.

Bi nameyê çalakwanan Gulîstane Çîya Îke eşkerayîye wende. Îke veng da Konseya Ewropa (YE) û Komîteya Vergirewtişê Îşkenceyî CPTyî  ke wa sozê ke dayî bîyarî ca. Îke wina dewam kerd: ‘‘ Seba ke CPT û YE sozî dayî ma û Ocalanî 2 reyî avûkatanê xo de pêvînayîş kerd ma çalakîya xo qedînaye. Ganî tecrîdê serê birêz Ocalanî cade bêro wedarnayene û polîtîkaya îrade şiktişî bêro qedînayene. Wa CPT û Konseya Ewropa berpirsîyarîya xo bîyarê ca, rolê xo kay bikerê û tecrîdî bidê wedartene.

Ma xeylêk reyî sekretaryaya CPTyî de pêvînayîşî kerdî. Reyna ma selahîyetdaranê Parlamantoya Ewropa û Konseya Ewropa de zî ameyî têhet û derheqê babete de qisey kerd. Heme pêvînayîş de înan bi xo vatênê Ocalanî ser o tecrîd esto û no nîno qebulkerdene. Bitaybetî sekreteryaya CPTyî zaf sozî dayî. Vatêne eke şima çalakîye biqedîne ma do hîna zaf vera tecrîdî gelç vejê. Xora coka ma çalakîye qedînaye. Seba ke heme sazîyan sozî dayî ma çalakîye qedînaye.

Dima ke Ocalan di rey avûkat û reyêk zî keyeyê xo de pêvînayîş kerd tecrîd reyna ame dewam kerdene. CPT zî sey Tirkîya huqûqî binpay keno. Ma zaf eşkera vanê ke eke CPT biwazo tecrîdê Îmrali hewteyêk de yeno qedînayene. Ma sey çalakwananê grevê vêşanîye reyna veng danê û vanê ke wa peynîya sîtemê îşkenceyî yê Îmraliyî bêro. CPT ganî na babete selahîyetê xo  goreyê qanûnanê mîyanneteweyî bişuxulno û verê tecîrî bîgêro.‘‘

Badê eşkerayîye parlamenteranê Ewropa zî vera tecrîdî nêrazîbîyayîş xo ramojna û waşt ke Konseya Ewropa û CPT wa berpisîyarîya xo biyarê ca. Parlamenteran seba ke Ewropa vera tecrîdî bêveng a hêrsê  xo ard ziwan û vat ganî Ocalan cade serbest bêro veradayene.