Grevê vêşanîye yê Strasboûrgî yo ke seba wedaritişê tecrîdkerdişê Rayberê Şarê Kurdî Abdullah Ocalanî yeno kerdene, çapemenîya Ewropa da ca girewt.

Rojnameyanê rojane yê Almanya ra "Tageszeitung" (TAZ) bi xebere-analîz ca da çalakîye.

Meqaleya ke hetê muxabîrê rojnameyî Christian Jakobî ra ameya nuştene de, bale ancîyena bi serê rewşa weşîye ya çalakwanan û waştişê înan yeno kerdene.

Jakoboyî yo ke seba meqaleye şîyo Strasbourgî, pêvînayîşo ke hemserekê KCDK-E'yî Yuksel Koçî reyde kerdo, wendekaranê xo reyde pare kerd. Meqaleye de têkoşînê Koçî, bi taybet têkoşînê vera sîysetê krîmînalîzekerdişê Kurdan ê Almanya, ard vîrî. Jakobî da zanayene ke seba ke rewşa weşîye ya Koçî baş nêbîya, tena nêm saetî eşkayo ey reyde pêvînayîş bikero.

Jakoboyi meqaleya xo de ca da nê vatişanê Koçî: “Seba wedaritişê tecrîdkerdişê Ocalanî ma heme welat û bajaranê Ewropa de çalakîyî viraştî, stantê zanayîşî awan kerdî. Ma selahîyetdaranê Konseya Ewropa û temsîlkaranê partîyanê sîyasîyan reyde pêvînayîşî kerdî. Bi kilmî ma heme rayîr û rêçê demokratîkî ceribnayî, labelê ma kerd nêkerd tecrîd nêwedarîya. Ma zî bêçare mendê ke dest bi na çalakîye kerd.

Ma bi çalakîye nêwazenê bimirê, eksê ci ma wazenê bi na çalakîye verê merdişanê merdiman ê bînan bigê. Çalakîya grevê vêşanîye xokiştiş nîya, grevê vêşanîye metodêkê xoverrodayîşî yo. Almanya  eşkena na babete de zaf çîyan bikera. Labelê çekan roşena Erdoganî, PKK’yî qedexe kena, Kurdan zî krîmînalîze kena. Hîna ke kesêk na çalakîye de nêmerdo, ganî Almanya rolêko baş bigo xo dest.”

Rojnameyî dewamê xebera xo de ca da vatişanê komîteya amadekarî ya grevê vêşanîye ra Serhat Agirî. Agirî vat, “Çalakwanan pîya no qerar da, labelê kam biwazo eşkeno dest çalakîye ra raverdo. Na çalakîye bi temamî îradeyê înan ya azadîye ra girêdayî ya.”