Tornê Seyîd Rizayî Rustem Polat Mainz de ame oxirkerdene

Tornê Seyîd Rizayî Rustem Polato ke krîzê qelbî ra şîyo heqîya xo Cemxaneyê Gustavburgî yê Mainzî yê Almanya de bi beyîtanê Mîkaîl Aslan û Ferhat Tunçî ame oxirkerdene.

Tornê Seyîd Rizayî Rustem Polato 70 serre şaristanê Mainzî yê Almanya de roja îneyî serê sibayî  şi heqîya xo. Polat serê sibayî dima ke krîzê qelbî derbaz kerd wedarîya nêweşxane la rixmê xîretan zî nêxelisîya.

Seba Rustem Polatî Cemxaneyê Gustavburgî yê Mainzî merasîmê oxirkerdişê heqî ame serûberkerdene. Merasîmê oxirkerdişî hetê Pîr Huseyîn Bîldîkî ra ame îdarekerdene. Domananê Rustem Polatî Ozleme Polat û Suleyman Polat merasîm de qisey kerd. Hunermendan Mîkaîl Aslan û Ferhat Tunçî zî serê tabutî de beyîtî wendî.

Cenazaya Rustem Polatî roja dişmeyî seba definkerdişî do bêra erşawitene Dêrsimî.