10ê teşrîna verêne de tewr tay 100 merkezanê dinya de Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dîyabî destpêkerdene. Endamê Kongreya Neteweyî ya Kurdîstanî (KNK) Adem Uzunî derheqê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ANFyî rê qisey kerd.

Adem Uzunî dîyar kerd ke dezgehê mîyanneteweyî, mehkeme û rêxistinî vera tecrîdê Îmraliyî vengê xo nêvejenê û erkanê xo nêkenê. Uzunî vat: ''Nê dezgehî û rêxistinî seba têkilîyanê xo yê bi Tirkîya bêveng ê. Wexto ke babete bena Rayberîye dezgehê sey CPT, Konseya Ewropa, Mehkemeya Heqanê Merdiman û Neteweyanê Yewbîyayeyan xo dûrî gênê. PKK 2002 de gêrîya lîsteya 'terorî'. O çax PKKyî şer zî nêkerdêne. Înan bi zelalî vat ke a raşte nêwazenê şer biqedo. Dezgehanê Ewropa xo îlegalîze kerdo. 31 mengî yo Rayber Apoyî ra xeberêke nêna girewtene. Pêro dinya vera ney payan ser de ya. La Komîteya Vergirewtişê Îşkenceyî (CPT) tênêgêrena, erkanê xo nêana ca.''

Adem Uzunî pare kerd ke Tirkîya wazena kurdan bi temamî çin bikera û vat: ''Dewleta tirke seba ney hêzanê xo rey de cergan şuxilnena. Ma no Rojawan de zî dî.''

Uzunî bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û vat: ''Ma plan kerd ke 74 merkezan de hemle bidîya destpêkerdene la tewr tay 100 merkezan de bi eşkerayîye hemle paştî dîya. Xeylêk roşnvîr, hunermend, sîyasetmedar, cinî û ciwanî tewrê na hemle bîyî. Serkewtişê na hemle do bêro manaya qedînayîşê qirkerdişê vera kurdan. Paradîgmaya Rayber Apoyî ewro pêro dinya rê bena hêvî. Paştdayîşê seba na hemle zî îsbatê ney o. Ewro ziwanê şorişî pêro dinya de kurdkî ya. Kurdî serkêşîya şorişan kenê. Coka na Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' zaf stratejîk û girîng a. 

Ma do çarçewa na hemle de bikerê ke pêro dezgeh û hukmatê mîyanneteweyî neçare bimanê ke bire bidê ke Rayber Apo azad bibo. Seba azadîya Rayberîye û çareserîya meseleya kurdan ganî ma destkewteyanê stratejîkan bivisnê destî. Îmkanê ma zaf ê. Ganî na hemle de safhaya verêne şiknayîşê tecrîdî û safhaya diyîne zî caardişê azadîya Ocalanî biba.''

Uzunî vist vîrî ke fikrê Rayberê Şarê Kurdî her ke şino benê globalî û vat: ''Şorişê Rojawanî bingeyê fikranê Rayber Apoyî de ame kerdene, Şorişê 'Jin, Jiyan, Azadî' bi felsefeya Rayber Apoyî aver şi. Reyna nîqaşê ekolojîkî zî çarçewa paradîgmaya Rayber Apoyî de yenê kerdene.''

Uzunî peynîya qiseykerdişê xo de îfade kerd ke Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' bi temsîlkarîya dezgeh û têgêrayîşan dewam kena û vat: ''Ma do bikerê ke na hemle tim rojdem de bimana. Ma do kampanyaya îmzayan bikerê û bidê Yewîya Ewropa, Konseya Ewropa û CPTyî. Ma do pêvînayîş, roniştiş û konferansan bikerê, zîyaretan bikerê. Hînî kurdî xebatanê xo her cephe de bi hawayêkê aktîfî kenê. Ma do çarçewa na hemle de xeylêk xebatanê sîyasîyan zî bikerê. ''